Europe, Asia · 163 Days · 41 Moments · September 2017

Sarina's und Pfanne's Asiereis


10 March 2018

BANGKOK Und iz isches scho wider so wit, i ga hei! I hocke am Flughafe u warte... Aber i chami fang ad Temperature vor Schwiz gwahne, so fescht chüele si dä Flughafe:) I fröie mi iz für heizcho, aber i würd scho o gern no lenger blibe. Es git so viu Sache woni wirde vermisse, di feine Frücht, d Sunne uz Meer, nöii Bekantschafte und Fründschafte und eifach di Freiheit woni ha dörfe gniesse! Di Reis isch e unvergesslechi Zit gsi, i ha so viu tolli Momente und Abentür dörfe erläbe! O wes mengisch nid so tolli Zitte het geh, isches eifach nume dr absolut Wahnsin gsi! Und ad Sarina und Löre, MERCI VIU VIU VIU MAU!! Dir sit di beschti Reisegruppe gsi wonimer cha vorsteue! I hanech so fescht gern!! Und iz Tschüssli Wermi und Sunne vo Thailand und Hallo chauti Schwiz!

2 March 2018

KOH CHANG Mir si wider in Thailand acho und scho ab uf di nächschti Insle. Zersch heimer aber no e zimlechi Horrorfahrt mitem Boot über z Meer dörfe gniesse bismer de nach langer Reis dert si acho. Mir si imene ruhige Örtli ganz im Süde vor Insle gsi u hei no üsi letschte Täg zäme gnosse. Ds heisst viu gspiut, bädelet, gässä, gspaziert, mitem Roller umebrumet und sogar es Glas Wii trunke (für mi z erschte sit 5 Monet). Mitem Kajak simer no umenes Inseli umepadlet u ei Nami lang heimer zäme zeichnet und gmaut. Ds isch so e schöni Zit gsi miter Löre. Aber ner ischsi witerzoge und i ha no paar Täg alleini uf dere tolle Insle gnosse. Z Hightlight isch definitiv z Touche gsi! I bi miteme Touchboot usegfahre und mir hei sooooooooo ungloublech viu Fische gseh! Ds isch wi im Aquarium und no viu besser! Und vorauem di blau tüpflete Stachuroche und Schnägli heimer gfaue:)

24 February 2018

Teil 2: Jaa u ner heimer da no so paar Lapalie mit dr Xundheit gha, Riisebüle, abgheiti Zeienägu, chli Vrdouigsproblemi, Antibiotika wo eim flachleit... Aber ds isch aus scho wieder vrgässe. Öppis angers wo aube no gnärvt het si di riise Tourihorde! Mir si da mängisch sicher nid besser xi, aber so di gstesste Lüt wo vo überau nume hurti wei es Foto schiesse u ner wyter oder d Chinese i ihrne Riisegruppe wo überau dr Wäg vrsperre si scho recht nervig xi... Tierschutz i dene Länder existiert öppe gar nid. Mängisch hettme da schlimmi Sache xee... Zum Glück heimer sowieso ke Fleisch gässe... Ja ds si mau so paar Sache xi, u äbe gad z.B. das mitem Plastig macht eim scho sehr hässig...

23 February 2018

Hie im Journi hei mir bis itz vor auem di schöne Sache vo üsere Reis vrzeut. Izz geits aber o einisch drum, was aus nidso toll isch xi. Plastik, Plastik, Plastik.... Ds isch würklech schrecklech! Überau wome häreluegt xeet me Plastik! U zwar en masse! I de Stedt, ufem Land, ade Flussufer, am Strand, im Meer... Mängisch het me nid chönne ga schwümme weus soviu Plastig het im Meer gha. U sogar vom Flugzüg us hetme riisigi Plastigfeuder xe schwümme. U bim surfe hesch bim Paddle au Minute wider öppis ade Häng gha. D Surflehrer heisech e Spass drusgmacht Plastigseckli aus Chappene aazlege... U sogar imne Nationalpark wome het Iitritt zahlt u wo jede Tag hunderti vo Touriste inegö isch aus em Wanderweg entlang vou... So chunntme schogad zum nächste Problem, dr Vrpackig. Ds isch ja scho bi üs heftig, aber dert nogad mau meh... Fr jede Scheiss bechunnsch eis oder zwöi Plastigseckli. U wed ner seisch „no bag, please“ de wirsch huerre komisch aagluegt.
KOH RONG SANLOEM Nach dr ruhige Trouminsle simer zersch gd chli gschockt und agschisse gsi, womer uf di grösseri Insle mit viu meh Vouk si cho. Überau Lüt, lutig Musig, e Dorm mit Froue wo kreische wägere Muus, steiherti Bett u Wäng wo fasch nid exischtiere, so guet ghörtme d Musig düre... Aber am nächschte Morge het d Weut scho wider besser usgseh. Mir hei mega schön chönne ga schnorchle und hei wider z Läbe gnosse mit Ässä und ab und zue chli Bier. Einisch simer no zumene angere Strand gwanderet, dürne schöne immer no sehr dichte Dschungu. Entüschend isch ner z Ziu gsi. Es heisst Clearwaterbay und isch eifach nume zuegmüut, nüt meh vo clear water... Seeeehr sehr schad! Am letschte Abe heimer no Bsuech us dr Schwiz becho. Hueber und d Flu si acho in Kambodscha und mir hei ganz viu brichtet, bishärigi Erläbnis ustuschet und tichlet:))

18 February 2018

KOH TA KIEV Mir si im Paradis gsi! Es ruhigs Inseli, es Zeutli direkt am Strand, wunderschöne Sunneungergang, schnorchle, sech lah tribe im Meer, vom Elefantefeuse gumpe, düre Dschungu spaziere und fein ässä. Derzue no mega liebi Lüt, zwar eher im Auter vo üsne Eutere, aber si si super luschtig gsi! Ds isch widermau Ferie bim Reise gsi!

12 February 2018

KAMPOT Mir si i Süde vo Kambodscha abe düset. Ungerwegs heimer no e chline Unfau gha, mir hei mitem Bus e Roller agfahre. Zum Glück isch nüt schlimmers passiert u mir si heil acho! Kampot seuber isch sehr herzig und es git suuuper feins Ässä. Mir hei imene Bungalow am Fluss gwohnt und am Abe dr Sunneungergang vomene Boot us chönne gniesse. Düre Tag simer ir bräntige Sunne zur La Plantation Pfäfferfarm usegfahre. Es super Projekt! Mir hei dörfe aui verschidene Pfäffersorte probiere und si heinis zeigt wi ds about wird. Zuesätzlech heisi no ganz viu verschideni Frücht und mitem Gwinn ungerstütze si d Dorfschueu. Und d Pfäffer-Zitroneglace isch dr Hammer gsi! Am nechschte Tag simer mitem Roller id Bärge ufe gfahre, düre Dschungu uf schöne kurvige Strasse bis zumene fasch trochene Wasserfau. Leider hets obe ke Tanksteu gha, aber zum Glück het d Reserve gd genau no di ganzi Strecki abe gelngt:))

8 February 2018

PHNOM PHEN I däm Bricht geiz nid um was mir hei erläbt oder gseh. Es geit um d Gschicht vo Kambodscha. I cha ds hie nid i aune Details usfüere, drum hoffeni das dir säuber no öppis drüber nacheleset und nech drfür interessieret. Leider weisme bi üs ir Schwiz viu z weni über ds Thema, das nidemau ir Schueu zur Sprach chunnt... D Khmer, d Lüt vo Kambodscha hei e extrem schlimmi Vergangeheit und di isch leider immer no present, da viu Lüt no läbe wo ds hei miterlebt. Vo 1975-79 si hie d Khmer Rouge ar Macht gsi. Ds isch e Zit vo Zwangsarbeit, Hunger, Gwaut und Tod gsi. Mir si es ehemaligs Gfängnis und Killing Fields us dere Zit ga aluege und werde ds nie meh vergesse. Lüt si wi Tier i chline Zeue fasch ohni Ässä ghaute worde, nackt am Bode ligend. Me hetse gfouteret für Geständnis z erzwinge und hetse zum Schluss uf de Killing fields abgschlachtet und i Löcher gworfe. Di Lüt dörfe nie vergesse werde und jede söu vo dem wüsse, dass so öppis nie wider cha passiere!!

4 February 2018

BATTAMBANG D Sarina isch guet wider daheime acho und mir si di letschte Täg in Battambang gsi, es härzigs, chli verschlafnigs Stedli. Dert simer z erschte Mau so richtig i Kontakt cho miter schreckleche Vergangeheit vo Kambodscha. Ufemne Bärg ir nechi vor Stadt hei d Khmer Rouge es Verhöhrzentrum gha und hundertig vo Lüt ner eifach ine töiifi Höhli abegschosse fürse los z werde. Di Killing Caves si bedrückend und schrecklech gsi u für üs isches eifach nid möglech sech vorzsteue was sech i dere Zit aus het abgspiut. Biud 2 isch eini vo viune Foutermethode wo si agwendet worde zum Geständnis erzwinge. Am Abe heimer ner zum Sunneungergang Millione vo Fledermüs gseh useflüge (Biud 3, de dunku Streife si Flädermüs) und hei mit üsem Tuktuk es angers Tuktuk abgschlept. Leider heimerne ungerwegs öppe 10 mau verlore weu z Seili nid so ghäbt het... Und ufem Mäeit gshet meh eifach immer wider luschtigi Sache:)

3 February 2018

SIEM REAP - KAMBODSCHA Ds isch d Stadt bide Temple vo Angkor. I dene füf Täg dört simer nid nume d Temple, sondern ono angeri Sache ga aaluege. Einisch dr Markt im Stadtzentrum, wo di Fleischerin richtig gern fürnes Foto posiert het 😅 U einisch i sone Werkstadt wome de Künstler bim Steihoue, Houz schnitze, Side bemale, Blech chlopfe etc. het chönne zueluege. U nach dr Stadt siner no für zwöi Täg chli ufds Land use ines Homestay zure kambodschanische Familie. Dert simer ufd Lotusfarm u dür d Riisfeuder gloffe. U ner isch scho dr Abschied cho 😪 D'Pfanne u d'Löre zieh in Kambodscha witer u ig hami scho es bitzli i richtig hei bewegt, nämlech uf Bangkok...

28 January 2018

SIEM REAP (ANGKOR WAT) - KAMBODSCHA Hie befindet sech di jahrhundertauti Tempustadt Angkor. Ganz viu auti Temple u ganzi Tempuaalage chame hie ga besichtige, mir si drü Täg gange. Paari si ziemlech guet restauriert worde, angeri si sehr zerfaue u vor Natur überwachse. 🌿 Es isch zwar ziemlech tüür xi (62$) u weus so berüemt isch hets viune Orte recht viu Lüt gha, aber es hetsech glohnt, weus eifach würklech krass beidruckend isch! Üs hei natürlech vorauem di überwachsnige u chli einsamere Temple gfaue ☺️

25 January 2018

PHNOM PENH - Während di angere no paar Tägli meh uf Don Det chillet hei u dert ono si ga Kajak fahre, bi ig scho uf Kambodscha gange. I ha zwöi Täg ir Houptstadt vrbracht, weui dert chli meh über d Gschicht vo dem Land ha wöue erfahre. Di letschte Jahrzehnt si nemlech huerre schlimm xi für d Bevöukerig, zersch wegem Indochina-Chrieg u ner weg dr Machtergriefig vo de Rote Khmer (Kommuniste). Im aute Foltergfängnis isch es sehr guets aber sehr krasses, schockierends u truurig u hässig machends Museum iigrichtet worde... D Stadt seuber isch nid mega sympathisch... Gross u lut u etc... Ner bini wyter uf Siem Reap, dert hei mir üs aui wieder troffe 👩‍👧‍👧

23 January 2018

DON DET - 4000 ISLANDS, LAOS Ganz im Süde vo Laos befindesech di sognennte 4000 Insle im Mekong. Hie hei mir es wyters Paradies gfunge! 🌼🌸Uf dr Insle Don Det louft aus ganz gmüetlech u langsam ab. Mir hei üs gad sofort "Hängomatasia" iigfange, ds isch e Chrankheit wome nume no cha z Asie ir Hängematte umehänge ☺️ Näbebii heimer lecker u günstig gässe, Velotüürli ungerno, dr Mekong zdürabtuubet mit Traktorschlüüch, Spieli gspiut etc. Ah u es het es Resti gha vomne usgwanderete Schwyzer u sire laotische Frou, dert heimer zum Zmorge e Rösti gässe! 🦎🐟🌞🍍🍜🍹🍻🌴🛶⛱ Good to know: e 6dl-Fläsche Bier chostet in Laos übrigens 1.50 CHF!!!

18 January 2018

THAKHEK-THE LOOP Mir hei üs vier Tag mitem Roller uf di zum teu e chli löcherige Strasse vo Laos gwagt:) Vo Thakek us isches los gange dür wunderschöni Bärge und a Stouseeä entlang bis nach Thalang, womer imene chline Bungalow dür krassischt Sunneungergang am See hei bewunderet. Am nächschte Morge simer zum Sunneufgang ufgstange u ner losdüset 150 km bis zur Konglor Höhli. Dert hetme miteme chline Böötli dürne ganze Bärg chönne dürefahre u mit Stirnlampe d Steiformatione ud Flädermüüs beobachte. Sehr beiidruckend! Wider heimer imene wunderschöne Bungalow gschlafe, mir si immer richtug kaput gsi am Abe! Ner isches di glichi Strecki zrügg u mir heis richtig gnosse uf dene kurvige Strasse. Am letschte Tag simer no ine chlineri Höhli und ungerwegs fasch verbratet. Ds isch so toll gsi zum d Landschaft vo Laos z erkunde und di isch troumhaft! Aber es isch o sehr ahstrengend und o gfährlech wäge de Schlaglöcher und angerne irere Fahrwiis... U zum Schluss hani no e Piuzfrise becho :))

13 January 2018

VIENTIANE - Ir Houptstadt vo Laos hei mir d'Löre am Flughafe abghout 🛬 Pfanne u d Löre hei beidi Fröidesträne ide Ouge gha 🙈 Nachdem d Löre ihres Jetlag chli het usgschlafe gha simer ufe nightmarket u ga ässe, mir hei üses eigete chline Füürli gha mitemne Tontopf wome Nudle u Gmües dinn chöcherlet. 🍜 U mitemne Beerlao simer ga dr Sunneungergang überem Mekong luege 🌅 U einisch simer no e Nami ine typisch laotischi "herbal sauna", es Dampfbad mit früsche Chrütli. Dert heimer o es Kaffi-Tamarind-Joghurt Bodyscrub chönne mache, mir hei recht lustig usxee 😉

11 January 2018

VANG VIENG Es sich iz o bi üs widermau chaut u rägnerisch, leider... Geschter heimer miter Janine e Rollerusflug düre Näbu umd Räge gmacht. Trotzdem heimer e chli öppis vo dere troumhaft Bärglandschaft vo Laos chönne gseh. Ungerwägs heimer e Stopp bire Höhli gmacht, wo nume mir drü ganz alleini im Stockdunkle si umegstoglet. Vou düregfrohre simer dahei acho u de e riiichtig feini Pizza ga ässä! Vor drü Täg simer mitem Velo ungerwägs gsi und zwöi angeri Höhline ga ahluege. Ds isch richtig schön und spannend, vou verschideni Steiformatione und es glitzeret so schön. Aber es isch o chli unheimlech und d Sarina isch richtig erchlüpft, wo ufzmau e Schwizer isch useme Loch uftoucht :) Und iz wartemer uf üse Bus uf Vientianne für de morn d Löre vom Flughafe ga abzhole!! :) Judihuii Geischäs!!

4 January 2018

ELEFANT CONSERVATION CENTER- Mir hei e suuper tolli wuche im ECC in Sayabury verbracht. Ds isch es Camp wosech ufd Rettig und Erhautig vo Elefante i Gfangeschaft het spezialisiert. Si biete arbeitslose, chranke, schwangere und Baby- Elefante e guete Platz zum Läbe mit viu viu guetem Ässä und Bewegig. Natürlech isch ds no lang nid d Natur, aber öppis vom Beschte für di momentani Situation. Di Lüt leischte e tolli Arbeit! Mir hei d Elefante dörfe beobachte, ihne Ässä versteckt und viu überse glachet, si sie eifach soo härzig! Auso Volunteers heimer Papier us Elefantegaggu und Boumrinde gmacht, Grass ungerem Zuun wäggjättet und am Staff bir Arbeit ghoufe. Mir hei viu über di beeidruckende Tier und ihri Mahouts (Elefnateführer) glehrt, wo leider in Laos scho fasch usgstorbe si obwous z Land vode Millione Elefante isch. Mir heis sehr fescht gnosse dert, hei chönne Kajak fahre, tolli Lüt kenneglehrt, riichtig feins laotisches Ässä gnosse und si dene Riise chli necher cho!

31 December 2017

LUANG PRABANG - isch öppe di berüemtisti u me seit hübschischti Stadt in Laos. Hie isch o dr Houptsitz vode Franzose xi während dr Koloniauzyt, u ds xeet me ade Hüsli und weus Baguette und Crêpes git 😉 Mir hei ufem Boot e Schwyzerin, d Janine kenneglert, mit ihre heimer e Usflug zude Kuang Si Falls gmacht. Uuuungloublech schön! Aber o ungloublech viu angeri Touris! A Siuvester simer ines ganz guets u fr hie tüürs Italienischs Restaurant. Für 25.- heimer richtig geil gässe: E Salat (mit richtigem Balsamico u Oliveöl), e Pizza und Gnioccis mit Cherrytomätlisauce. Und es Bierli. Hihi mir heinis richtig riich gfüut i dem Resti. U ir Schwiz hättme fr ds Geud öppe nume d Pizza becho 😋 U ner heimer mit de Laote gfiiret. So ufemne riise Platz si aui ghocket u hei gässe u viiu Bier trunke u tanzet. E Familie het üs a ihre Tisch iiglade 😅 Mir sinis chli lustig vorcho weumer ihre Tanzstiu niso im Griff hei gha. Zum Glück simer nid gad ganz di einzige Touris xi wosech blamiert hei 💃🏻

30 December 2017

MEKONG - Vo Pai us heimer di drütägigi Reis nach Luang Prabang i Agriff gno. Zersch ischs e Tag lang mitemne Minibussli düre Norde vo Thailand ad Grenze zu Laos gange. Am nächste Tag am Morge ischme über d Grenze was echli lang het duuret mit aastaa, Visum beatrage u so. Ner simer uf ds Boot! Sechs Stung ischs dür di sehr grüeni u hüglegi Landschaft vo Laos gange. Ab u zue hetme chlini Dörfli us Houzhüttli am Ufer xe, Geisse, Chüe u ab u zue Ching oder Buure wo am Ufer ihri Gärte hei. Isch wunderschön u gmüetlech xi! In Pak Beng hettme übernachtet u am nächste Morge am 9i wieder ufds Boot. Mir wäre no fasch idi fauschi Richtig gfahre weumer zersch ids fausche si iigstige 😅 Nach wytere 7 Stung d Landschaft aaluege u chli döse oder läse simer in Luang Prabang aacho. 🏞 Scho nach dene zwöi Täg heimer üs id Landschaft vo Laos vrliebt gha ☺️

27 December 2017

PAI - Womer si aacho, auso am 23. simer afa gad mau ane Party gange irgendwo dusse im Züg usse 🌴🎇 Mit Füürshow! Dr 24. u 25. Dezember heimer ziemlech gmüetlech gno ;) Hie isch jede Aabe e Nightmarket wo ds auerauerbeste Ässe het womesech nume cha vorsteue!!! U da isch fasch chli Wiehnachtsmäritsstimmig ufcho womer Crêpe hei gässe u so warm si aagleit xi weus so chaut isch da obe!! Um Pai ume gits viu schöni Sache wome cha ga luege! Mir si bim Canyon xi, wome het so ufemne schmale Grat het chönne loufe u aube het müesse chlättere. Ner simer bimne Wasserfau xi und e Organic Farm mitemne "landsplit" ga aaluege. Däm Buur sis Land hets bimne Erdbebe gspaute u d Späut si teilwiis 5m töif u me cha düreloufe. U dert heimer o ganz viu z'Ässe vor Farm becho 😍 Süesshärdöpfle, Papaya, Erdnüssli, Ärdbeerigonfi, Bananechips, Roselladrink u Rosellawii 🍷 Hüt hets dr ganz Tag gschiffet u üses Hüttli isch so richtig gar nid dicht u es isch chaut 😬 aber mir si mitem Roller zude heisse Quelle gfahre

24 December 2017

22 December 2017

CHIANG MAI - Chiang Mai isch di zwöitgrössti Stadt in Thailand mit öppe 150'000 Iiwohner (Bangkok het 8 Millione)! Es isch richtig chaut worde da obe. Am Aabe u ir Nacht aube so 13-15 grad u mir si fasch vrfrohre!!! Mir si uf sehr coole Märkt xi wos Gwürz, Gmües, Frücht, Fleisch, Fisch, Blueme, Streetfood, Chleider oder Krimskrams het gä. Am zwöite Tag simer chli us dr Stadt use zumne Wasserfau chli ga loufe u picknicke. U am dritte Tag isch d Pfanne ine Thai-Chochkurs gange u het 7 vrschidnigi Sache gchöcherlet! U jedes Mau wemer ire Stadt si gömer o i Park, ds isch immer supergmüetlech u spannend aune Lüt zuezluege! Es hetsech e ganzi Gruppe vo Akroyogis vrsammlet wo richtig krassi Sache hei gmacht. U viu Thais wo ihri Ründeli jöggerle u zwüschedrinn no ad Chraftüebigsgrät gö, aso quasi Vitaparcours 😉 U mir hei üsi Lieblingssmoothiemischig usegfunge: Banane-Passionsfrucht ☺️ Smoothies chame hie fasch a jedem Egge für öppe 1-2 Franke choufe 😍

16 December 2017

SUKHOTHAI - Hie isch dr historical park of Sukhothai, e Tempustadt mit ganz viune Ruine oder restaurierte Temple, Pagodä u Buddhas. Me cha mitem Velo chli umefahre u d Stimmig isch so richtig friedlech ☺️

14 December 2017

KO PHA NGAN - Di Insle isch e Troum! Dschungu, Wasserfäu u wunderschöni Buchte mit Sandstränd! Früecher isch ds mau es richtigs Hippieparadies xi, izz leider meistens völlig vo Touriste überloffe. Vorauem bi Voumond wäge dr wäutberüemte Fullmoonparty. Mir hei mega Glück gha wöu mer gad nach dr letste Fullmoonparty si aacho u o gad am Ändi vor Rägezyt hie. Zersch simer zwöi Nächt imne mega schöne Bungalow xi mit Blick ufds Meer. Ner simer imne Hostel xi u si jede Tag mitem Roller ane angere Strand gfahre. Einisch heimer e Dschuwanderig zum Bottlebeach gmacht 🌿🕸🐜🦋 U si ner mitem Taxiboat 🚤 wieder zrügg. Vom Schnorchle simer auerdings hie überau ziemlech enttüscht worde, ds chame mit Indonesie nid vrgliiche... Vo gester uf hüt simer mit Sack und Pack ane chlyne vrlassnige Strand ga schlaafe 🌒 Ussert dasses chly chaut isch worde heimers wunderschön gha mit Lagerfüür u viiune Stärnschnuppe ✨ (di zwöi letschte Föteli si vo dert)

7 December 2017

BANGKOK - Ei Wuche hei mir i dere Stadt vrbraacht wo meh Iiwohner het aus di ganzi Schwyz! Es isch supercool xi! Mir hei nachem i viune Sache scho ziemlech zrüggblibnige Indonesie fasch chli e Kulturschock gha wi zivilisiert u modern u globalisiert hie aus isch! Me cha i dere Stadt aus mache u choufe womesech nidmau cha vorsteue 😅 Mir hei ganz viu vo üsne Bangkok-To-Dos erledigt, z.B. Bei la wachse, Hennatattoo, nöii Schue choufe, e Brüue la mache etc. Mir heinis vode vrschidenste Kulture la beruusche im little India und im richtig vrrückte Chinatown (Krimskrams hoch tuusig!!! Mir wüsse nid wär ds unnötige Züg aus chouft wos dert git?!) Und mir hei dr Leo usem Dreamcatchercamp hie wieder troffe u si per Zuefau sogar im gliche Hostel glandet (i gloub ds isch irgendwie Schicksau!). Amne Aabe simer einisch ine Rooftopbar gange 🍹🌃 Izz heimer entschide no fürne Wuche i Süde abe z gaa (mitem Leo) u nomau chli ga z Insleläbe gniesse🏝 När geits de i Norde ufe 🌿🐘⛰

1 December 2017

Gester Aabe heimer di Riisestadt Surabaya vrlaa u si mit öppe 3h Vrspätig uf Jakarta gfloge, d Houptstadt vo Indonesie. Eigentlech heimer gmeint mir chöi de dert nochli schlaafe, aber weumer so spät si aacho u so lang hei müesse uf d Ruckseck heimer ner scho gad füre nechst Flug Jakarta-Bangkok chönne ga iichecke. Mir si ziemlech müed xi u ig chli chrank u d Pfanne chli komisch wegem Antibiotika u es isch e mega ungmüetleche Flug xi... U es isch schockierend xi was für Mängine a Plastik me usem Flüger use im Meer het xe... Umweltschutz kenne d Indonesier leider gar nid u es macht eim richtig hässig.. Mir heis gschafft ds Bangkok aazcho 🎉 U nach dene 30h wach si heimer üsi Hostelbett meh aus gliebt 😍 Am Aabe simer nochli id Stadt gange, id Khao Shan Road. Ds isch so d' Backpackerstrass, me cha au di coole Sache choufe wome ir Schwyz nume drvo cha tröime ☺️ Und mir si ines vegetarischs feins Restaurant ga ässe u es het für ziemlech biuig Riiseportione gä wo mega fein si xi ♥️♥️♥️
Dir dörft öich sehr gern üssere zu üsne Journis ;) so mit paare Frage u süschtige Kommentär. De wird di ganzi Sach chli spannender 🙈

29 November 2017

Usgrächnet denn wo mir uf Bangkok hätte wöue wyterflüge het dr Agungvulkan grad z Gfüu gha er wott nächstens usbräche 🌋 (z Foto obe isch nid vo üs). Er het 4km Äsche i Himmu ufe gspöit u me het Lava gsichtet. Im Süde vo Bali wäre mir sehr sicher xi, aber üse Flug isch canclet worde u üses Visum louft gli us.. Drum heimer üs entschide, mitem Bus u dr Fähri ufd Nachbarsinsle Java z'fahre, weus z Bali je nach dem no lang cha ga bis d Flugis wieder flüge. Mir hei gester am 3 am Nami sone Bus vrwütscht u hei chly e längi nid mega gmüetlechi Fahrt hinger üs. 🚌⛴ Hüt am Morge am 6i simer aacho u heis gschafft e Flug morn Aabe über Jakarta nach Bangkok z bueche. Izz simer chli hungrig u müed ire indonesische Grossstadt u es het chli gnervt, soviu Züg am Handy abzkläre wi e nöiie Flug bueche oder ds Vrsicherigszüg. Aber izz gömer de öppis z Ässe ga sueche, "ga jage" wis d Meike&Daniel nenne u ga Tichu spiele 🐲 und mir si z'erst mau während üsere Reis imne Hotel u zahle glich nume 20.- fr beid

26 November 2017

Tschüss Lombok!! Mit dr Fähri bini mitem Leo usem Camp dürd Nacht nach Bali gfahre u de ner nach Canggu u dert hani de d Sarina wider troffe! Per Zuefau si ono d Meike und dr Daniel, zwöi usem Camp, im gliche Hostel gsi wi mir u iz simer sitt denn mit ihne ungerwegs. Canggu seuber isch nid mega toll, e chli z cool und hipp für üs. Gmacht heimer dert o nid so viu, i bi chrank gsi u di Angere si ane Strand und i Usgang... Eigentlech heimer üsi Zit im Hostel und im Spitau verbracht. Da i sit drü Wuche immer mau ume nid so fitt bi gsi, simer nach Kuta iz Spitau zum Dokter. Dert heimer usegfunge dasi e Parasit, Amöbene, i mir inne ha und iz muesi e hässlech langi Antibiotikakuur mache. Di Ärzt dert si e chli kompliziert mengisch u mi weiss nid so recht wasme cha gloube, aber schlussendlech isch aus guet cho! Und iz chani sogar wider richtigi Sache ässä, so wi di riiichtig gueti Pizza womernis zum Schluss hei gönnt!!

23 November 2017

Mit chli Verspätig schribe o ig iz mi erscht Bricht. I bi no e Wuche ohni d Sarina im Dreamcatcher camp blibe, weus eifach meega toll isch dert und füre Moment genau dr richtig Ort für mi. I ha no so viu unvergesslechi Moment dörfe erläbe und sehr tolli Lüt kenneglehrt. Mitem ganze Camp simer nomau ufd secret islands gange und hei dert wider am Strand gsunge, früsche Thunfisch und aus möglechs Angers gässä, gschlafe und si ir Nacht mitem fluoreszierende Plankton ga schnorchle. Es isch magisch gsi, wi z ganze Meer so het gfunklet!! Mitem Boot simer am nechschte Tag ufene Schnorchutour und d Meike, e ganz e tolli Dütschi, het z erschte mau i irem Läbe gschnorchlet u isch gar nümm usem Wasser usecho. Ds si zwöi ganz bsunderi Täg gsi!! Zrügg im Camp hets jede Tag gwitteret und i Bäch grägnet, trotzdem ischnis nie längwillig gsi. Mir si i Dschungu, dürd Riisfeuder und zude Wasserfäu oder zämä am Füür ghocket und hei z Läbä gnosse! Es isch chli wines zwöit Daheime für mi worde!!

20 November 2017

Ar Pfänni geits sowyt i weiss z Lombok guet! ☺️ I ha 3 Täg in Ubud vrbracht! Ds isch chly Liebi ufe zwöit Blick xi, bim erste Mau hani di Stadt nemlech niso cool gfunge, izz aber mega! I bi mitem David, emne Spanier woni z Lombok im Dreamcatchercamp ha kennegleert, ungerwägs xi. Oh u es isch so super xi in Ubud mau wieder chli öppis angers aus Nasi Goreng (Fried rice) u Mie Goreng (Froed noodles) z ässe! Es het sogar ä Bäckerei gha mit Brot u Chäs 😍 Dem Tourismus sei Dank 😅 Mir si ga e balinesischi Tanzuffüerig luege, ds isch sehr vrwirrend weume eifach nie druschunnt um was dasses geit 😅 aber es isch eifach beeidruckend!!! Eis vode tollste Erläbnis uf dere Reis isch dr holy spring temple xi. Ds isch e Tämpu wode unger 33 Queue bättisch u dr Chopf wischisch, und me darf ds o mache aus Tourist. Isch richtig magisch xi! U vorgester heimer e Sunneufgangwanderig ufe Baturvulkan gmacht, vrgliche zum Rinjani u schwyzer Wanderige e Spaziergang. D Ussicht vo obe isch fantastisch xi! 🌅

16 November 2017

Nach de Gilis simer wieder uf Tete Batu ids Dreamcatchercamp zrügg 😉 Mir ghöre dert quasi zur Familie 💕 Es isch eifach würklech super dert! Wime ufem Biud xeet heimer einisch Rösti gmacht... Und es louft immer öppis mit de Locals wo dert schaffe oder wo o süsch derthäre chöme. Lagerfüür, gitärrele u trummele, singe, Spieli spiele, tanze, DJ spiele wi ufem Biud, bastle, choche, ässe, umecruise und so wyter :)) D Pfanne blibt no echly dert, i bi izz uf dr Fähri nach Bali 🌴 Mir träffe üs de ire Wuche wieder ☺️

12 November 2017

Mir si fürne Wuche ufd Gili islands gange. Zersch 3 Täg uf Gili Meno, dert heimer eifach chli entspannt u meh aus schnorchle chame eh nid mache. D Koraue si teilwys sehr kaputt xi... Aber es het viu Fische u Meeresschiudchrötli gha. U ner simer uf Gili Trawangan, ufd Partyinsle. Ds isch no lustig xi mau so zur abwechslig! S hetsech aagfüut wi Ferie vom Reise 😉 Ds isch würklech krass touristisch!

5 November 2017

Nachem Rinjanitrekking simer in Tete Batu im Dreamcatchercamp glandet. Mir hei nur 3 Nächt buechet gha, si aber izz scho 9 blibe ;) Es isch soo schön hie! Me isch quasi im Dschungu 🙈 Mit zwöi eigene Wasserfäu 😍D Duschi isch e Wasserstrau usemne Bambusrohr unger freiem Himmu 💕 U jede Aabe gits es Lagerfüür mit Singsong ✨ U aui Lüt wo hie si, aso di angere Reisende, die wo da schaffe u d Locals wo aube dahere chöme cho chille si sooo super! ♥️ Mir hei no e Trip uf d Secret island gmacht womer ner bi Voumond hei campet. U am nächste Tag si ga schnorchle 🐡🐠 Und mir si üsi Wanderschue losworde, ufem Föteli xeet me dr Mister Ti mit Pfännis ;)) Mir hei üses Paradies gfunge, aber mir gö izz trotzdem wyter, zrüggcho chöimer immer 🌸

29 October 2017

Mir si ufnes 3-tagestrekking ufe Rinjanivulkan gange 🌋 Es isch ungloublech schön aber o ungloublech aastrengend xi. Am erste Tag ischme vo Sembalun (1100müm) dür d Savanne ufe Kraterrand (2600) gloffe. Dert hetme e wunderschöni Ussicht ufe Kratersee und ufe Gipfu gha. D Nacht isch mega chaut xi u üses Zäut het düreglaa wos het gschiffet u ar Pfanne ire Schlafsack isch kaputt xi ;) Nach weni Schlaf isches ner am 2i ir Nacht mit Stirnlampe losgange... 1100 Höhemeter i 3 Stung damit me bim Sunneufgang ufem Gipfu isch. Dr Wäg isch ziemlech schrecklech xi, weu aus vou Vulkangröll isch u weus so steil ufe geit ischme immer wieder abgrütscht u d Schue hetme sowieso vou gha 😅 I weiss immer no nid wienis gnau gschafft ha uf de Gipfu z'cho, aber i bi uf d Sekunde gnau wo d Sunne erschiene isch dobe xi ☺️ E unbeschrieblech schöne Moment... Vo dert obe hetme bis uf Bali mitem Agungvulkan u bis uf Sumbawa überexee..
Dr Abstieg wieder zum Kraterrand isch recht lustig xi, es hetsech aagfüut wi schiifahee weume uf dem Gröll abegrütscht isch. Woni mau ha mini Schue usgläärt ischmer dr eint Schue nebem Weg abegheit, zum Glück hani sone nette Guide gha wone isch ga hole 😬 Wieder dunger bim Kraterrandcamp hets Zmorge gä, när ischs wytergange zum See u zude heisse Quelle i Krater abe (2000müm). Ds het so richtig guet daa dert z bade!!! Aber ner ischs oscho wieder seehr steil ufegange uf di angeri Site vom Kraterrand (2600müm). Nach dene 10h wandere ischme ziemlech kaputt xi ;) Nachem Znachtesse bi Sunneungergang über Bali und nochli rede mit de angere Lüt vor Gruppe simer ga schlaafe. Am nächste Morge am 6i ufstaa u zmörgele (i bi no vomne Aff bedroht worde weuer e Fläsche Wasser het wöue chlaue), ner isch losgange u zwar 2000m abe, abe, abe!!! Düre Dschungu 🙈 Ah u was ds krasse a dem ganze isch, d Träger mache di ganzi Route mit Flipflops!!! U mit 30kg a somne Bambusstaab uf de Schultere!!

21 October 2017

20 October 2017

In Sengiggi simer vo de Bsitzer vom Homestay zumne hinduististische Fest iiglade worde. Es isch e Tanzuffüehrig xi mit balinesische Tänzerinne, Dämone, Affemänner u mir hei eigentlech ke Ahnig gha um was dasses gnau geit. Aber es isch äuä mega lustig xi, weu aui Lüt immer glachet hei. U d Ching si immer extra wyt füre damit se d Affemänner ner si ga vrschüüche u si kreischend si furtgsecklet. Izze simer z Kuta/Lombok. Hie chame mitem Roller a ganz viu wyssi Sandstränd fahre und es isch es riise Surferparadies! Hüt simer am Selong Belanak xi, da isches guet für Aafänger wi mi xi 🌊🏄🏽‍♀️ Gester simer imne traditionelle Sasakdörfli xi. Ds isch sehr touristisch aber es isch echt beeidruckend xi, i was für Hüser u mit was für Sache d Mönsche us Lombok früecher gläbt hei u zum Teu hüt ono düe.

16 October 2017

Mir hei sächs Täg uf dr Insle Nusa Penida vrbracht 🏝Da hets üs extrem guet gfaue! Jede Tag heimer mitem Roller 🛵💨e Usflug zumne Strand, i Dschungu oder zumne Ussichtspunkt gmacht. I üsem Homestay heimer viu Lüt kenneglert womer aube dr Aabe mitne vrbracht hei. Am Mänti het d'Pfanne Geburtstag gha 🎂Ihre grösst Wunsch isch usgrächnet denn i Erfüllig gange, nämlech dass ig einisch i mim Läbe Durchfau bechume 😅

10 October 2017

Mitem würklech schnäue Speedboat simer vo Bali uf di chlini Insle Nusa Lembongan überebrätteret. Hie cruise mir mitem Roller quer über d'Insle u erkunde di schöne Klippe u Stränd. 🐚 Gester heimer e Schnorchuusflug mitem Boot gmacht. Bim Mantapoint heimer drü Mantas xee!! Süsch isches dert schrecklech xi, es het no öppe 5 angeri Boot mit Schnorchler dert gha. Aui Lüt si hysterisch dene arme Fische nachegschwumme u du hesch di ganz Zyt öpperem sini Flosse im Chopf gha... Am nächste Punkt, am Crystal Bay, isches drfür fantastisch xi! 🐠🐟🐡

6 October 2017

Ubud - Mir si für 5 Täg in Ubud imne mega härzige Homestay. Mir leere ganz viu nöis z'Ässe kenne, mängisch fein u mängisch ächt gruusig :D Hüt simer dr camphure ridge walk dür d Riisfäuder gloffe u heinis när e traditionelli balinesischi Massage gönnt wo soo schön isch xi! 🌸

3 October 2017

Zürich-Singapur-Denpasar Mir hei e gueti Reis um di haubi Wäut gha ✈️

28 September 2017

Scho gli geits los, i bi so langsam aber sicher parat 😉