Australia · 66 Days · 142 Moments · October 2016

Sarah Buchanan

Off to Australia!


20 December 2016

Mite Maria, woni in Cairns am Flughafe kenneglernt han, bini während oisem Zwüschestopp in Singapur d'Stadt nachli ga erkunde. Me hends grad rechtzitig zunre Liechtershow gschafft bide "Gardens by the bay". Uh e schöni Stimmig ischs gsi mit athmosphärischer Musik. Die Stadt isch wahnsinnig suber und gar nid so extrem asiatisch wien ichs mer vorgstellt han. Min 10h Ufenthalt isch da wie im Flug ume, well mer so viel cha mache a dem Flughafe. E Massage und e warmi Duschi hani mer na gönnt. 🙃Nach dem Bsuech i Singapur bini mittlerwiile uf allne foif Kontinent gstande! ☺️ Het grad Luscht uf wiiter reise gmacht! 😉

19 December 2016

Bye bye Australia! Es isch e wahnsinnig tolli Ziit gsi! Ich han so viel derfe erlebe und neus kennelerne, i de australischi Lifestyle chönne itauche, vieli tolli Fründschafte rund um de Erdball gschlosse und mich selber während dere Reis na besser kenneglernt. Au wenn mer bim Start grad e Träne über d'Bagge kulleret isch und de Abschied schwerfallt, freu ich mich uf dihei und mini Liebste! Eis weissi uf jede Fall- ich bin nid s'letsht mal da gsi! 😌❤️🇦🇺

18 December 2016

De letshti Abig in Australie isch abroche für mich und drum hets mit mine Reisekollege da in Cairns, na e paar Rundene Abschiedsdrinks geh. 😊🍻
Min letshtä Tag in Cairns hani mit chli Wiehnachtsshopping bi gfühlte 40 Grad verbracht...😅Drum bini nachene au ziemli schnell wiedr idr Lagune glandet. Nurna en Zwüschestopp bime usgibige Früchtemärt hets geh, woni mer en Sack voll frische Litschies gholt han. 😌Begleitet vode zwei Australier hani hüt namal e Ladig Aussie-Wortschatz abbecho. 😄 Sie hend da une sonen Trend, dass efach Wörter und Usdrück erfinded unds uf Urban Dictionary itreged. Die ganze Usdrück verbreitet sich denn au tatsächlich und werded in Wortschatz und tägliche Gebruch ufgnah! Sie hend für eis Wort zig Variante wie sichs chönd usdrücke. Ich find da macht die englisch Sprach so interessant, dass mer extrem kreativ chan demit umgah und so d'Sprach sehr spielerisch chan gstalte.

17 December 2016

Nume leider schiint scho de grössti Teil vom Riff tot z'si... Ich hans mer na viel lebiger und bunter vorgstellt alses gsi isch, aber die Ziite sind glaub leider efach verbi... Sisch fasch chli trurig zums aluege. Zrug in Cairns bini mit em Bryce und em Mitch na id Open-Air-Lagune, bevor mer denn ines Pub fein ga Znacht esse sind. Die Lagune isch de einzig Ort womer cha bade in Cairns, well im Meer giftigi Qualle, grossi Krokodil und Hai uf eim wartet. 🙈 Während dem ganze Tag hani min Aussie-Wortschatz chönne ufstockä haha! 😂 Schona schön hani na mit es paar Locals chönne undrwegs si! 😌
Scho früeh hani hüt müsse bim Hafe vorne sii zum s'Schiff i richtig Great Barrier Reef z'verwütsche. Bim Check-in hani die zwei Australier voder gestrige Tour wieder attroffe und sind schlussendli sogar ufem gliche Schiff glandet. 😄 D'Flosse und Maske montiert und itaucht bini is 28 Grad warme Wasser! Direkt sind mer es paar riesigi, bunti Fisch entgege z'schwümmä cho. S'beschte isch gsi, wenni es Stuck abetaucht bin und so ha chöne ade Siite vo allne Fisch schwümme, über d'Koralle schwebä und so Teil si vodr ganze Unterwasserwelt! 😍Ich bi praktisch en Scuba-Taucher gsi hüt hahah.

16 December 2016

Wemmer grad bi gföhrliche Tier sind (Australie isch ja rech en guete Ort für da😉): De Bill het gmeint mer seged sichr paranoisch gsi womer in Australie acho seged und gmeint sobald mer usem Flugzüg usstiged, dass en wisse Hai ufere Palme uf ois wartet und mit giftige Schlange um sich wirft. Aber s'gföhrlichste Tier in Australie isch kein Hai, kei Spinne, kei Schlange, kei Qualle und e keis Krokodil sondern ganz es normals Ross... Am meiste Lüt chömed ums Lebe im Kontakt miteme Ross. D'Opferzahl isch sogar grösser als alli andere Tierumfell zemmezellt. S'isch also alles halb so tragisch wie mer sichs vorstellt da une. 😉
Da obe in Cairns chunnt en seltne Vogel vor, wo Cassowary heisst. Ich han gmeint da seg öppe e truthangrosses Gfieder und harmlos. Het sich aber usegstellt, dass da Ding nachem Struss und em Emu de drittgrössti Vogel uf Erde isch und zu allem here ziemli gföhrli. Stimmt ich bin ja z'Australie ganz vergesse! 🙈De Bill het ois also churz ufklährt wie mer ois z'verhalte hend, wenn ois eine über de Weg lauft. Und zwar uf kein Fall wegrenne, wellr eim susch attackiert und mit sine scharfe 12.5cm lange Chralle ufschlitzt... 😳 Sie sind nid di hellste Vögel und drum mummer sich eifach nume probiere grösser mache we de Cassowary selber idem mer d'Erm uestreckt. Er denkt denn: "Oh das isch en grosse Cassowary", und laht eim in Rueh. 😅
Nacheme feine Zmorge mit frische Frücht ischs wiiter gange zu eim Wasserfall nachem andere. Einisch hemmer chönne dehinderchlettere, es anders mal ois massiere lah und eine sogar als natürlichi Wasserrutschi bruche. Während de Fahrt hett ois de Bill immer mal wiedr gfragt, ob mer Frage heged. Meistens het sich dadezue niemer gmulde sodass er eimal churz nach de Frag aghalte het, usgstiege isch und en riesige Brocke Stei zrug in Van gholt het. All hend sich total fragend agluegt und er meint nur so dezue: "Now you've got a fucking question!" 😂 De hettr schlussendli ussere grosse Höchi inen chline Kratersee krache lah zum demonstriere, dass de Ufprall us dere Höchi öppe dem entspricht wie wemmer uf Beton ufprallt. Absolut tödlich also... S'isch öppe d'Höchi gsi vode Harbour Bridge z'Sydney. En Ire het en Sturz vode Brufg aber mal tatssächlich überlebt.
Vom Tourguide vo Barefoottours persönlich abgholt im Hostel und mitere Umarmig begrüesst ischs hüt mitere chline, coole Gruppe ganzi 1100m ü. M. id Tablelands ue gange. Nid nume Backpackers sind debii gsi sondern endli au mal es paar Aussies! Und de Tourguide isch mal wieder zum schreie gsi! 😂Mit eim luschtige Spruch und interessante Fact nachem andere hett ois de Bill unterhalte und amüsiert. Ersti Frag vo öpperem bevor mer losgfahre sind isch gsi, wie lang mer werded fahre zum erste Stopp. Denn hett de Bill mit Zeigfinder und Dume e chlini Strecki azeigt und gmeint: "So lang öppe, wenns mitere Charte verglichsch. Zoomsch chli ane um einiges länger." 😄 Nachere lange, kurvige Strass isch de ersti Stopp en Vulkankratersee gsi, womer en agnehm warme Morgeschwumm zruggleit hend. S'einzige Krokodil, wo i dem See wohnt, het aber leider nid welle gah guete Morge sege und hemer drum nid gseh...🐊

15 December 2016

Mit dene lässige Mädels us Schottland, Neuseeland und Dütschland hani gesh de Abig inre schön athmosphärische Bar mit Liveband usklinge lah. 😌

14 December 2016

Mittlerwille bini au scho in Cairns, mim letshte Stopp vo de Reis, acho. Nacheme feine BBQ im Hostel hets en Didgeridoo Crashkurs geh, woni sogar en rech guete Beat anebracht han! 💪🏼😄

13 December 2016

Was mir aber viel besser gfallt, isch die Tier ide Wildnis z'gseh! Und drum hani mi uf d'Suechi nach es paar freie Koalas und Rock-Wallabies gmacht. Und da mit vollem Erfolg! 😍 D'Koalas sind da am mache gsi wos am beste chönd - und da isch, schlafe! 😌
En Bsuech uf Magnetic Island hani mer nid welle entgah lah und bin gesh mit de Fähre na überedüst. Det hani di erst Sanctuary sit mim Ufenthalt z'Australie bsuecht und es paar Tier id Hend und um de Hals becho. 😉 Min Favorit isch natürli de Koala gsi!

12 December 2016

Wells in Townsville obe au schiffet und d'Wöschleine im Freie nid überdacht sind, hend mini Mitbewohnerinne und ich oises Zimmer mal schön inen Tröchnigsrum uminstalliert für oisi Wösch. 😅

10 December 2016

De ganzi Spass isch na um einiges besser worde mit dere lässige Truppe on board! ☺️ Und well mers so guet gha hend hemmer nachem ganze Trip na e gmeinsams Picknick gmacht zrug in Airlie Beach binre Badelagunä. Isch da e schöns Gfühl gsi mal ohni de Stingersuit is Wasser chöne gah! 😄 Meh hend uh Glück gha mitem Wetter, well am Abig vo oisere Rückchehr hets afange gewaltig obenabe schütte!! D'Regeziit isch i vollem Gange gsi. 😳 Han hüt zmids ide Nacht gmeint jetzt überschwemmts denn mis Appartment. Isch aber zum Glück alles troche bliibe. Susch isch de Rege aber ganz agnehm i dere Hitz. 😅
En tolle Schnorchelstopp hets hüt au namal geh. Knallblaus Wasser und gaaanz viel Fisch! 😍 Ich han sogar de Nemo gfunde! ☺️ Zwüschedure hani mal na müsse en Tauchgang ilegge, well mer d'GoPro us de Hend gheit isch. 🙈Ich mu sege, dass ichs mer chli bunter vorgstellt han da Koralleriff, aber mal luege wies im Verglich isch zum Outer-Reef in Cairns obe, woni na anegahn. 🙃 Nid nur Fisch und Qualle hemmer gseh, sondern au öfters mal e Meeresschildchrot. ☺️Die hend nur leider immer d'Flucht ergriffe sobalds as schnorchle gange isch. 😌 Und wemmer nid im Wasser gsi sind hemmer en "sun-bake" gna ufem Deck. (; Aussies taufed alles genau so wies usgseht. Fisch miteme gäle Schwanz -> Yellowtail, ä Koralle, wo usgseht wie es Hirn -> Brain Coral, e grossi Sandwüesti -> Great Sandy Desert, es grosses Koralleriff -> Great Barrier Reef etc. 😄 Wenn mer also de Name vo öppisem nid weiss, tauft mers efach mal so wies usgseht und d'Chance bestaht ziemli gross, dass denn au wüki de richtig Name isch.
A eine vode schönste Strend vode Welt ischs am zweite Tag gange. An Whiteheaven Beach. Und er isch en wahre Traum! 😍 Er gilt mit sim nahezu 99% Quarzghalt als eine vode wissiste Strend weltwit. Wemer det isch lohnts sich e churzi Spa-Session izlegge, well sich de fin Sand extrem guet als Boddyscrub eignet und mer sich nachene wie neugebore fühlt. (; Au Zäh chamer demit butzä. 😄Ide seichte Gwesser simmer es paar chline Lemonsharks und Stachelroche hinedrigwatet. Da aber immer i Begleitig vo oisem "Stingersuit". De hemmer zum Schutz vor dene giftige Qualle treit. Me het aber au denn immer na sone mulmigs Gfühl wemmer is Wasser gaht im Wüsse, dass so ziemli s'giftigste Tier überhaupt umenand isch. Me hend au immer mal wieder e Qualle gseh am Segelschiff verbiizie. Bi mim erste Schnorchelgang het mich am Bei au igendwas gna, wells u brennt het plötzli. Giftig wirds nid gsi si, aber ob die Azüg wüki schützed isch zweiti Frag. Naja me sind uf jede Fall immer all wieder zum Schiff zrugcho.

9 December 2016

D'Segel ghisst, Sunnecreme igschmiert und es schöns Plätzli ufem Deck gfunde - los ischs gange mitem Segelturn um d'Whitsunday Islands ume! Füren churze Moment bini na Teil vode Crew worde zum helfe d'Segel hissä. 😁Mit dere frische Brise hani dere Hitz vom Festland chli chönne entcho. Wemer so richtig schön in Wind ie seglet, lupfts di eint Siite vom Schiff uh wiit ue, dass mer so richtig übers Wasser flügt! S'chan bis zu 110 Grad kippe (Mast im Wasser). De 26 Tonne schweri Kiel under em Schiff sorgt aber defür, dasses nid ganz umkippt. Nachere Namittags-Schnorcheltour hets scho langsam afange dämmere sodass mer ois es schöns ruhigs Plätzli ufem Wasser gsuecht hend zum übernachte. En feine Znacht, es paar Drinks und denn isch eine nachem andere i sini Kajüte verschwunde. Das det une aber extrem heiss gsi isch, han ich mit es paar anderne en Schlafplatz ufem Deck obe igrichtet. Es isch saumässig unbequem gsi, aber de schön Sternehimmel het da wieder guet gmacht! 😌

8 December 2016

Nachere 14 Stund Busfahrt letsh Nacht bini in Airlie Beach acho, em Start vom Great Barrier Reef! 😍 Chas chum fasse, dass mich nurna e churzi Schifffahrt vo dem Naturwunder trennt. Mittlerwiile bini au im Tropegebiet acho sodass i am liebste efach di ganz Zit ohni Chleider undrwegs wär - es isch sooo heiss da!! Und ich bin nani mal ganz im Norde obe...Ide Nacht chüelts maximal uf chüeli 24 Grad abe. 😅 Zur Abchüelig hani leider nid is Meer chöne, well ab jetzt richtig Norde extrem giftigi Qualle umenand sind und de Pool i mim schöne Bush Village restauriert wird. Heisst e Tonne Glacé mu ane und e iskalti Duschi neh! Gesagt getan, hebt aber leidr nid so lang ane. 🙈 Ab morn bini denn für zwei Tag ufeme Segeltörn um d'Whitsundays ume zum am Great Barrier Reef ga schnorchle. I freu mi riesig druf! 😍 Hoffentli gaht det denn chli e frischi Brisä. 😌

7 December 2016

Vieli Lüt uf dere Insle und allgemein z'Australie sind so relaxed und ufgstellt druf wie de Gaz. Da hetter mal eme Wareliferant ame süttig heisse Namittag zuegrüeft: "Hey how are you doing today?" Als Antwort becho hettr "Good thank you, although a few degrees more would be nice!" 😄 Und gnau de Aussie Way of Life mitm stetige Motto "no worries!" gnüss ich da so. Australie isch en wunderschöne Fleck uf dere Erde, e Welt ohni z'viel Sorge und unnötige Stress und wo d'Lüt efach es Lache ufem Gsicht träged!

6 December 2016

Fascht scho Privatshuttel like ischs denn zu mim Abladepunkt gange. De Gaz het denn akündt er wird ime mega-Tempo det ane fahre, jetzt wo de Van leer isch und nur so über die Sandhügel flüge! Ich han denn dadezue mini Kamera na churz füregholt zum es Foti mache und da fragt er mi so: "Are you going to film the accident?" 😄 Igendswenn seiter: "Do you already know where you are?" Ich: "Ahm nope, everything looks exactly the same!" Gaz: "Don't you recognize that tree?!" 😄 Han denn nachli pläuderlet mitm und usegfunde, dass er da scho sit 38 Jahr macht unds als Jugendliche dozmal sogar sini allererscht Fahrt gsi isch uf sonre Sandpiste. Er isch da quasi ufgwachse. Die nechst Gruppe staht am folgende Tag au scho bereit sodass er alles wieder vo vorne afangt. Denn hanen gfragt, ob er au mal Pause heg. Und dadezue hetter gfunde das seg für ihn e Pause, er liebis über die Sandpiste z'heize und ois uf de Insle umenandzfüehre. So sött mer begeisteret si vo sim eigne Job!
Letshti Stopp uf oisere Reis über Fraser Island isch namal en See gsi und akündt worde dur de Gaz mit: "Good afternoon it is GAZA at the front!" (und bewegt sini Hand i some Tanzmove weg vo sich). 😄Det hets e Rundi Stand Up Paddling ghe und binre Partie Beach-Water-Volleyball hemmer na es paar Brasilianer abelah. 😎 Im Hindergrund isch kein Vulkanusbruch im gange sondern en riese Waldbrand. D'Rosie fragt de Gaz so: "What is that fire over there?" Gaz, total gspielt seriös: "Ah that is when things get really hot and burst out into flames! Did you just ask what a fire is?!" 😂 Ich han für es paar Minute durreglacht hahaha. Im Aschluss simmer zume Spot gfahre zum alli Lüt, wo in Süde abereised abzlade. Ufem Weg det ane hets namal e Jamsession mit mitsinge im Van und lushtige Tanzmoves vom Gaz geh. Ja und denn hets für mich au leider scho gheisse Abschied neh vodere lässige Truppe 😢, well ich di einzig gsi bin wo in Norde ue reist und drum namal es Fährtli mitm Gaz vor mir gha han.
Am dritte Tag isch oisi Gruppe uf 10 Lüt abegschrumpft, well nid all e Drütagestour buecht hend. Aber de Tag het sich namal so richtig glohnt! Agfange hettr mittere Wanderig dur es Regewaldstuck gfolgt vonre riese Sanddüne miteme grüenliche See namens "Lake Wabby". Det hemmer ois chli abküelt und ois vo de Fisch im See e Pedikür verpasse lah! Het ziemli kützlät. 😄 Ufem IPhone gits en Klingelton, wo "Kristalle" heisst. De Gaz het de uf sim IPhone installiert. Denn ischs mal zmids ufere Wanderig abgange und wells so tönt wie wenn ime Märli e Fee uftaucht hettr agfange dur es Feld hüpfe mit wedelnde Ärm! 😂 Oh und hüt isch ois mal nid nur was über de Weg krabblet sondern gloffe. 😋 Zwar keine vo dene vielne iheimische Dingos defür aber en Waran!

5 December 2016

(Bild folgt/Picture following) Da im Eli Creek hets denn na Tubing-Action geh. Naja Action isch chli übertriebe, well mer nur wahnsinnig langsam de chli Frischwasserstrom durab triebe worde isch. ^^ Mitem Van zrug am Strand hemmer es paar Lüt gseh bade und da het de Gaz per Lutsprecher durregeh: "Ah look and wait for the shark attack!" 😅 Zrug im Regewald ischs über en grosse blinde Hügel gange, wo de Gaz plötzli saulut afangt kreische und ufs Gas druckt zum ois hine all de Idruck z'geh mer fahred grad übers steile Board durab nebed em Weg! 😄
Zum ois dra erinnere, dass bald Wiehnachte isch hemmer au es paar söttig Songs z'ghöre becho. Glaube de Teil, womer am meiste gfühlt hend isch "It doesn't really feel like christmas at all!" gsi. Au nid verwunderlich wemmer miteme Bier ide Hand, im Bikini, bi 30 Grad ame Strand na düst! 😂
De ersti Usflugspunkt sind "d'Champagne Pools" gsi. Es natürlichs Meerbad inre Steiformation. Die heissed so, well die brechende Welle es sprudle im Bad verursached. S'ish de einzig Ort womer cha bade uf dere Siite vo de Insle, da ziemli viel hungrigi Hai uf Fuettersuechi sind direkt adr Küste. Me hend denn au eine gseh vom "Indian Head" obe abe. Da isch en Felsvorsprung, wo vom Captain Cook im Jahr 1700 während sinere Durchfahrt eso tauft worde isch. Er het zu dem Ziitpunkt ganz viel Aborigines ufem Fels obe gseh und da i früenere Ziite "Indians" als Bezeichnig für vieli Uriwohner vo Länder brucht worde isch, het de Fels so sin Name becho. Aber nid nur Hai hemmer vo det obe abe gseh sondern au drü grossi Meeresschildchrote. De Gaz het den gmeint es segi grad Paarigssaison also mümmer ines paar Sekunde churz wegluege! 😉😄 Wiiter ischs gange zume alte Schiffwrack! Gaz: "So to get you into the mood this one is for you!" Und switched uf sinre Jukebox zum Titanicsong! 😂
Langi Fahrte sind am zweite Tag ufem Programm gstande! Und wehe me isch nid pünktlich am Morge. Für die gits e Portion Vegemite! 😄Da isch en australische Brotufstrich und öppe s'grüstigste, woni je probiert han! 🙈 Nid nur dur de Regewald ischs gange sondern au direkt am "75 Mile Beach" nebed de Welle na! Da han ich wahsinnig toll gfunde.😍 Begleitet worde ish de ganze Trip dur gueti Musig vom Gaz sinre Jambox. 😄 Während de Fahrt hettr ganz viel interessanti Infos zudr Insle und Aborigines Gschichte verzellt. Nebsh dem ganze informative Geplauder hettr aber au immer mal wieder en Seich dezwüschepflanzt wie: "Ou look that's a famous bird over there. It's Russel the Gull!" Oder denn hettr de vordeste Sitz (ich bin mit mim Grüppli immer z'vorderst ghockt) eimal efach e massivi Riese-Stabschrecke agrüert! D'Rosie wo vo allem wa meh we vier Bei het zemmezuckt, het denn mal schön es Gekreische gstartet im Bus! 😂 Wennr nix lebigs gha het, hetrs mit Gummi Schlange und Spinne versuecht!

4 December 2016

Nacheme feine Znacht sind d'Bar Games gstartet worde, wo de Gaz efach jede, wo ide Bar ghockt isch zu de Spiel itreit het. I chline Gruppe het mer versuecht mit Spiel, wiä Jazzcharte mitm Mul wiiterzgeh, de Titel vom Sieger z'hole. Oisi Gruppe "Gaz's hot bitches" (ja er het ois nid nur itreit sondern au Neme verpasst 😂) isch zweite worde wuhuuu haha. En Cocktail Jug hets für die Leistig geh. 😌
Als ersts is zum Lake McKenzie gange. Mit oisem Van immer na zwüsche de Bäum hett de Gaz de See eso akündt: "Now look to your left...hold it...not yet...BOOM LAKE!" Da isch en Grundwassersee mit tüfblauem Wasser und wissem Sand. Da hemmer chli Ziit zum entspanne becho, bevors nachem Zmittag ufe Bush-Wanderig gange isch. Mitere Ufklärig vom Gaz, dass so fash alles giftig isch und bisst uf dere Insle und alles 10 mal grösser isch als normal hettr ois dur de Wald gschickt. Gwüssi Spinnewabe ufem Weg hend einzelni Fede idr Dicki vo Silch gha und sind extrem stabil! 😳Ich mu sege ich han s'Gfühl, dassi mittlerwile ziemli abghertet bin wa da abelangt unds halb so tragisch isch. 😄Während oisem tropisch heisse Bush Hike isch mer a lebendigem Lib vo Moskitos gfresse worde, wemmer keis genials Antibrum agsprützt het! Nach Tea und Cookies im Regewald ischs denn au scho zrug zu de Lodges gange, womer de Tag gmüetlich am Strand bime schöne Sunneuntergang usklinge lah hend.
Nacheme feine "full english breakfast" ide Dingo-Bar simer an Pier abeghockt und hend uf oisi Tour Gruppe gwartet, wo mit de Fähre ufem Weg uf d'Insle gsi ish. Da hani für eimal au gnosse gha, dass Zmorge, Zmittag und Znacht gmacht worde isch und denn na sehr guet! Allgemein sind die drü Teg als Abwechslig sehr entspannt gsi, well mer sich het chöne triebe lah und alles für eim organisiert gsi ish und mer mal nid selber alles mu plane. 🙃 Währenddesse mir gmüetlich det une gsesse sind, isch oise Tourguide, Gaz, schomal ga guete Morge wünsche cho. De het idene drü Teg en wesentliche Bitrag zu dere super Stimmig ide Gruppe gleistet. Da isch so ziemli eine vode lushtigste Persone, woni je atroffe han! 😂 Total en trochne, sarkastische Humor hettr gha! Wo denn entli oisi ganz Gruppe à 24 Lüt im Van ghockt isch, ischs losgange über die unpreparierte, holprige Sandpiste vode Insle. Es het eim rech umenandgrüert uf de Sitz. Je wiiter hine dass mer ghockt isch, desto höcher isch mer gfloge! 😄

3 December 2016

Los ischs gange is Abentür Fraser Island! Ganzi drü Teg bini ime 4x4 Van vom Verastalter "Cooldingo" mitere super Truppe und eme wahnsinnig luschtige Tourguide über die grössti Sandinsle vode Welt gratteret! Ich han sogar na e Pre-Night inklusive gha, sodass ich bereits en Tag vor Tourbeginn uf d'Insle bracht worde bin und so am nechste Morge usgschlafe ha chönne id Tour starte. Susch wird mer nemli am Morge ufem Festland mit sim ganze Geschlepp abgholt, uf d'Insle bracht und direkt in Van uf d'Tour gsteckt, was chli stressig cha si. A Dem Vortag hani bereits drü Brite kenneglernt, woni die ganze drü Teg efach eis Gaudi gha han mitne! Mit de Rosie hani denn unter anderem mis Zimmer teilt (: Under cho simmer i hübsche Wald-Lodges. Da sind jewils ganzi Appartments mit 5 Schlafsäl. Im Gmeinschaftsrum ischs am erste Abig inere grössere Gruppe a Engländer und Ire rundgange mit englische Trinkspiel. 😂 Da hett aber au nur am erste Tag stattgfunde, well die Tour eim scho rech gschluchet het.

2 December 2016

S'isch luschtig, während de Reis trifft mer immer mal wieder bekannti Gsichter ah, well all ufem Weg uf Cairns ue sind sit Sydney. ☺️
Mini schnüglige Hostel-Hustier. 😍

1 December 2016

Mis jetzige Hostel isch meh wiene WG, woni mitere Schottin, ere Holländerin undere Neuseeländerin teil. Rech gmüetli da Ganze. (: Gesh hani mer en hammer indische Curry als Take Away gholt und bime gmeinsame Znacht idr Stube gnosse. Igendswenn simmer uf Iwohnerzahle z'spreche cho und hend usegfunde, dass d'Population vo Neuseeland efach mal de Helfti vode Schwiiz entspricht! 😳Plus het mi Neuseeland mittlerwile au rech agfresse, dassi unbedingt au mal na det ane will! 😌😄

30 November 2016

Hervey Bay isch es chlises Küstedorf und gilt als Usgangslag für die grössti Sandinsle vodr Welt (Fraser Island). Ines paar Tag gahts für mich denn au det ane. Bis denn probiere Ziit chli z'vertriebe da ufm Festland. Zum eine hets en sehr lange Steg ufs Meer usse, wo vieli Iheimischi am fische sind und en 14km lange Veloweg de Küste nah, woni beides gmacht ha gesh. Ufem Weg hani e riese Kolonie vode grösste Flughünd weltwiit entdeckt, wo da in Hervey Bay heimisch sind. Uh herzigi Chöpf hends, aber wenn denn am Abig all in Himmel uestiged und umenandkrächsed chas na rech unheimlich würke.^^ Ja denn hets sich eich scho fash mite Aktivitäte. Die restliche Teg liggi eifach an Strand und schaff chli a minre Brüni. 😄
Da Känguru hani anre Tankstell gfunde während eme Stopp vom Car Richtig Hervey Bay. Da isch mal s'Maskottchen für Australie gsi adr Olympische Spiel in Sydney. Nebsh lässige Busfahrer gits au müesame wie de damal... De het ois 6h lang zwungenermasse welle unterhalte und lushtig si. Ischr aber leider nid gsi sondern het efach igendswie en gstresste Idruck gmacht. Stendig ischer mit Quizz und nid-lustige-Witz hinefüre cho. Es hend efach all s'glich denkt i dem Bus: "Shut up!" Und ich han blöderwiis na eine vode guete, vordere Sitz gha und müsse als Versuechskanninchen für sini blöde Spieli herehebe. 🙈

28 November 2016

Stand Up Paddling, en tolle Sport! Da het öppis uh entspannts, machi uf jede Fall wieder mal! Während minre Entdeckigstour hani sogar na en riesige Stachelroche gseh. Und spötistens wenn es Boot a dir verbii fahrt sind d'Glichgwichtskünst gfraget. ^^
Flashpackers Hostel in Noosa. Sehr empfehlenswert! (:

27 November 2016

Am Abig hets eus ines atmosphärischs Restaurant mit sehr gueter Live-Musig und guete Drinks verschlage. Zum eine het e Reggae Band Stimmig gmacht und zum andere isch e Solosängerin uftrete, wo sone schöni Stimm und so schön gsunge het, dassi richtig Hüehnerhut becho han!
Noosa isch es super schöns, laid-back Stedtli so wien ich mir chlini Ortschafte in Australie vorgstellt han! Öppis womer mu gmacht ha wemmer da isch, isch de coastal-track dur de Nationalpark. Und gnau de isch hüt ufem Programm gstande. D'Lisa, wo mit mir im gliche Hostel bliibt, het sich minre hütige Wanderig de Klippe nah agschlosse. Ufem Weg hemmer es paar Delfin gseh und ein Traumstrand nachem andere! Ah so eim hemmer ois denn, nach dene ganze Höhe womer bezwunge hend, entspannt. Zwüschedure hani denn mal na en Tauchgang igleit binre grössere Welle im badwannewarme Wasser. ^^

26 November 2016

Hüt bini mitm ufgstelltiste Carfahrer, womer sich cha vorstelle, wiiter richtig Norde gfahre. Denn hettr ois alli durezehlt und gfunde: "very good all 33 happy little vegemites on board!" 😂 Chum simmer losgfahre hettr lut grüeft:"we are rollin'!" churz drufabe:"so where are we going, haven't done this run before..." 🙈Während de Fahrt hettr vor sich heregsunge wie zum bispiel: "we are all going on a summerholiday, where the sun is shining all day long dubidumdum", glachet und luschtigi Bemärkige gmacht. Und als krönende Abschiedssatz: "Okey you beautiful people, our next stop will be Noosa!" Und da bini jetzt 😊 Es liht zwar ade Sunshine Coast aber es schiffet! Heiss und nass isches. Ich chume de Trope immer necher!
So viel Spinne hani na nie uf eim Hufä gseh... Sind sicher öppe 200 Stuck gsi und dezue ane GROSS. Solangs i sicherer Distanz sind, isch aber alles i bester Ordnig.^^ Bin sowiso erstunt, han mi uf tusig mal schlimmers Gekrabel igstellt. Aber ich bin ja nani ide Trope, drum segis nani z'lut. 😁Wa uf Mount Coot-tha aber au na sehenswert gsi isch, isch die guet Ussicht uf Brisbane abe. En Teil vode Strecki bini ade pralle Hitz gloffe und drum schweissbadet dobe acho! 🙈

25 November 2016

Die öffentliche Busverbindige nutze macht efach kei Spass da! Fangt ah mitem Ticket löse bim Busfahrer, was oft für Verwirrig sorgt, wells mer amel seged ich fahr aber nid det ane... Scho klar ich stig au um! Meh het im Bus kei Durchsag womer isch, kei Azeigetafle, denn fahreds a vielne Ort efach 5 min früener dure, sodass nachene e Halbstund uf de nechst chash warte, di letshte Verbindige sind a gwüssne Ort am halbi 5, sodass am Schluss efach igendswo im Gaggo us hocksh und über e Stund chash heilaufe...Zum Glück het mi ein Busfahrer bim letshte Punkt uf da ufmerksam gmacht und mi grad direkt wiedr zrug id Stadt gna, abglade und mer d'Ticketchoste erspart. Google Maps isch zu mim treue Fründ worde! 🙈

24 November 2016

De City Hopper isch e chlini Fähre, womer gratis chah als Brisbane Rundfahrt nutzä und sich dur di frisch Brise chli chan abchüele bi dem heisse Wetter.
Mister Pokerface!
Es het es paar ziemli grossi Exemplar vo dene "Water Dragons" ume gha. Uf en ca. 1 Meter lange weri na fasch drufgstande, weller so tarnt gsi isch am Bode! 😅 Bevor da aber passiert, renneds zum Glück so luschtig, halbgumpend weg.
En Christbaum bi 32 Grad isch efach schräg!
Eifach mal de Nase nah dur Brisbane. Ersti Stopp ischen Märt gsi, woni en tolle frischpresste Fruchtsaft becho han, denn ischs wiitergange dur en schöne botanische Garte, wo mer vieli "Water Dragons" vor de Füess dureghuscht sind (s'eint oder andr mal bini na rech verschrocke^^). S'würkt amel so guet i dene Stadtgerte, wemer umgebe isch vo Grüen und im Hindergrund e Skyline in Himmel ue schüsst.
Mis hübsche Hostel (Aussie Way Backpacker) in Brisbane mit super gmüetlichem Balkon! 😊 Ich han gmerkt, dass ich all mini Hostels und Trips adr Ostküste scho Wuche vorus mus bueche, well d'Hochsaison grad so richtig in Fahrt chunnt da. Wemmer also es Reisepaket vo Ozexperience het, mumer unbedingt die Trips womer z'guet het mitm Ticket so früeh wi mögli bueche. Susch chans passiere, dass mer kein Platz meh bechunnt und, wells es Reisepaket isch, scho zahlt het defür.

22 November 2016

Byron Bay - Bin hüt am östlichste Punkt vo Australie gstande bim Cape Byron. Die Ussichte gsend super schön und friedlich us, Byron Bay isch aber alles andere als da. Useme chline, friedliche sehr relaxte Stedli isch es Party und Suf-Mekka worde... Bin gesh Abig ime absolut grauehafte Hostel gsi mit de primitivschte Mitbewohner woni je erlebt han. Het eich vier Necht det verbracht, han aber wortwörtlich d'Flucht uf Brisbane ergriffe und bin da wiedr ime super schöne Hostel undrcho. 😌 Ja nebsh tolle Erfahrige chas halt leider au zu unagnehme cho bim reise...D'Hostelbeschriebige lisi uf jede Fall ab jetzt na 10 mal gnauer durre. Am liebste hani so chlini, familiäri, relaxti Unterkünft und devinitiv kei so riese Partyhostel... Tipp: Endi November bis Endi Dezember fiiret all junge Schuelabgänger vo Australie in Byron Bay und Surfers Paradise ihren Abschluss und lönds jede Abig ziemli eskaliere. Wenner nid i die Partysaison wennd inegrate, mided die zwei Ort um die Ziit.

20 November 2016

Inre gmischte Gruppe us Holländer und Dütschä ischs hüt anes Wine-Tasting bide Hastings River Winerie gange. Es het sonen feine, süesse Portwii gha yummi 😌 Ganz guet gsi, au wenn ich gar nid so de Wiityp bin^^ Im Aschluss hemmer d'Fähre uf e Insle anen schöne Strand gna, det ois id Welle gstürtzt und per Autostopp mit es paar sehr hilfsbereite Aussies zrug is Hostel gfahre.
Port Mcquarie isch bekannt für sis Koala-Hospital. Han so einiges glernt über die herzige Fiicher. Zum Bispiel, dasses kei Bäre sind sondern usschlüsslich Büteltier. "Koala" bedütet i de Sprache vode Aborigines "kei Wasser", well sie nid trinked sondern di ganz Flüssigkeit us de Eukalyptusbletter entnehmed. En bekannte Mythos isch, dass Koalas stendig betäubt sind weg de Giftstoff ide Eukalyptusbletter, aber da trifft nid zue, well die Bletter hauptsächlich us Wasser bestönd. Drum füehred Koalas au sehr en gmüetliche Lebensstil mit viel Schlaf, well sie die Bletter guet verdaue münd zum überhaupt gnueg Energie drus z'gwünne. Koalas sind grau, wenn mer bruni gseht sinds chrank. Denn hani eini vode Volunteers gfragt, was mitne passiert, wenn es Tier im Hospital verstirbt und denn meint sie nur: "It's gonna go to the big Gumtree in the sky!" 😌
Han es Bett ime 6-er Frauedorm ime super gmüetliche und familiäre Hostel (Port Mcquarie Backpackers) da in Port Mcquarie. Miteme lässige Trüppli hets gesh Abig ä Wrap-Kochaction und e lushtigi Spielesession geh. 😊

18 November 2016

Han de letshti Tag nachli ide Botanical Gardens z'Sydney gnosse und de Vögel mini halb Guetzlipackig verfüetteret. Igendwenn sind sogar d'Müettere mit ihrne Junge nebe mir ghockt und hends direkt wiiter verfüetteret^^ Miitlerwiile sitzi aber ufem erste Car d'Ostküste duruf und verlah Sydney grad über d'Harbour Bridge! Next Stop: Port Mcquarie 😃
Dä dichti Wald bestaht hauptsächlich us Eukalyptusbäum. Und d'Bletter vodene Eukalyptus verdunsted äs ätherischs Öl, wo än fiine Nebel über d'Berge leiht und inre gwüsse Entfernig än blaue Schimmer verursacht. Dur da hend d'Blue Mountains ihren Name becho.
Uf de Zug gsprunge z'Sydney und ab id Blue Mountains gfahre mitm Martin. De Martin kenn ich vom Volleyball us de Schwiiz. Per Zuefall simmer grad beid glichziitg z'Sydney, was sich natürli abote het zum was zemme underneh. Dobe acho, simmer is nechste Hostel spaziert, hend e Zimmer buechet und denn nurna müsse entscheide wos söll anegah. De Hostelbsitzer het ois gmusteret und gfragt, ob mer scho e Ahnig heged wo ane dass mer göched ga wandere. Denn hemmer gfunde ja nani so gnau...Und er het uf da nur mit: "I do!" druf gantwortet und ois e super lässigi Route zu de Usichtspünkt und in Regewald abe zemmegstellt. Als krönende Abschluss vodr Wanderig ischs 1200 Stegetritt d'Schlucht duruf gange! Ja ich spür mini Wädli!

16 November 2016

Was d'Australier a Glacé anezauberet isch efach en Traum! 😍
Mittlerwiile gaht mini Reis ohni di zwei andere Mädels wiiter. Han für de hütig Tag aber bereits wieder e netti Begleitig gha und zwar vo de Nici us Düsseldorf, woni im Hostel kenneglernt han. Me hend de schön "Bondi to Coogee walk" gmacht. Da isch en Weg, wo vom bekannte Bondi-Beach de felsige Küste nah a versteckte chline Strend zum Coogee-Beach führt.
Nach de Beachpartie hend de Martin und ich ois es feins Glacé, en Drink und en guete Znacht bi Darling Harbour gönnt. 😊
Juhuiii endli wiedr en Volleyball ide Händ!!😍 Boah het da guet tah! De ganz Tag bini gesh mitem Martin und de Lisa in Manly hine gsi ga spörtle. Denn hemmer es paar Italiener, Schwede und en Tschech usegforderet und abebutzt. 😎
Und da isch sie namal, d'Harbour Bridge. Ich persönlich find de australischi Charme isch i dere Stadt leider chli verlore gange... Me trifft nemli chum na Australier ah sondern nurna Iwanderer und Touris.
Gesh hets bi Mondufgang na es Spektakel geh da z'Australie. Sish Supermoon Night gsi. De Mond isch sit 1948 nüme so nöch adr Erde gsi und het so hell glüchtet wie gesh Abig. 🌝
Geshter bini 20 km quer dur d'Stadt vo Bondi, über Bondi Junction, Woolahra, Paddington zu The Rocks (dä Geburtswiegi vom hütige Australie) dur d'Royal Botanic Gardens abe zum Hydepark und über d'Harbour Bridge gschuenet!

15 November 2016

Da het en Aborigine mit sim Didgeridoo zu moderne Beats mitgspielt. Het na sauguet tönt! 😄 Er het mer uf jede Fall en Ohrwurm verpasst gha.☺️

14 November 2016

Sydney het sich hüt vo sinre schönstä Siite zeigt! Bin hüt mit dä Gloria, änere alte Kolegin, uf Manly gfahre mit de Fähre d'Sunne am Strand ga gnüsse. Vode Fähre us het mer en super Blick uf s'Opera House und d'Harbour Bridge! Manly wird vode Australier so beschriebe: "Seven miles from Sydney and a thousand miles from care." De Satz triffts recht!

12 November 2016

Wuhuuuu meh hends endli ufs Flugzüg gshafft! Meh hends sogar fash für ois ellai, es ish praktisch leer.
Perth will ois nid gah lah! Oise Flug het ganzi 7.5 Stund Verspötig! Me sind so müed, well mer kei Minute gschlafe hend letsh Nacht, dass mer jetzt efach überall umeligged und probiered Schlaf nazhole.
Han e sehr erfolgrichi Shoppingtour hinder mir und en letshte lässige Usgang in Perth ufere rooftop Bar! Hend na es paar Irä kenneglernt, wo sonen starche Akzent hend, dass nid mal d'Brite oder d'Kanadier sie verstönd! 😂 Vom probiere d'Musig übertöne bim rede han ich am Endi vom Abig so ziemli kei Stimm meh gha. 🙈Am früene Morgä, nach dem lässige Abig, simmer na schnell zrug zum James, hend e churzi Duschi gna und sind ufs nechste Uber an Flughafe ghüpft! Bye bye westcoast hello eastcoast! 👋🏼

10 November 2016

Sind hüt dur d'Hippie-Stadt Fremantle gschlenderet und hend uh viel schöns interior design, Handwerk und tolls Streetart entdeckt.
Dä Tag isch cho, womer ois vom Campervan münd verabschiede. Über 6000 km hetter mit eus müsse durremache!

9 November 2016

D'Marketing Managerin vo Journi het mich us Interesse und Freud a mim Blog agschriebe und agfragt, ob ich zu eine vo ihrne Tester für die neue, unveröffentlichte Updates vom App will werde. Und da bini jetzt mit grossem Interesse debi. (: Au würed sie min Blog gern uf ihrne Social Media Plattforme platziere und im App selber hervorhebe. Alles uh lässig, dankä für da! 😊😉 Drum wirdi de Blog ab jetzt uf englisch wiiterschriebe.
Quokka-Fun on Rottnest Island! Mit de Fähre ischs überegange und mitm Velo eimal rundume. Ufem Weg hemmer immer mal wiedr di herzige Ficher atroffe, wo na sauschwierig sind guet vor d'Linse z'becho 😅 Dur de versterchti Wind am Namittag hets en extremi Schaukelfahrt zrug geh uf Perth! Huiuii zum Glück sind mir nid seechrank!

7 November 2016

Es must-have Summer Accessoire! 😋 Hüt simmer bereits zrug uf Perth düst und chönd bim James, eme Kolleg womer am erste Abig kenneglernt hend, für die nechste Täg bis es uf Sydney wiitergaht übernachte. Sooo lieb vonem! Und mir gnüssed de Luxus vome richtige Badzimmer undeme richtige Bett grad so imens, dass mer nüm usem Grinse usechömed. ☺️😄

6 November 2016

Grad bevor ich da Foti han welle mache fahrt en ältere Herr mit sim elektronische Rollstuel verbii grinst und fragt: "Do you need a lift?" hahah 😄 Au hemmer welle de Steg füre laufe und hend uf guet wetter ghofft. Da meint d'Lisa nur i es paar Minute wirds sunnig. En gwalts Optimist bi dem Wetter hemmer gfunde. Und denn henkt sie ah: "Ich bin kein Optimist ich bin en Meteorologe. Lueged hinders Auto det hets en blaue Fleck am Himmel!" ^^
Namal en geile charre! Sind na einigi Oldtimers umenandkurvet hüt. Sogar en Beetle komplett in Herbie Montur.
Hütigi Zmorge-Stopp
Grad zwei wahnsinnig gueti Glacéchugle gha bi Simmo's Icecreamery!!! 😍 Coconut Choc Fudge und Ferrero Rocher, äs Träumli!! Au wenn mer bi dem chüelere Wetter hüt scho fasch schlotternd dusghockt sind, sone Glacé laht mi alles rundume vergesse haha

5 November 2016

BBQ – It’s what’s for dinner
Da isch mal en nette Gartehag.
As links fahre gwönsch di na schnell, aber gwohnti Handlige wienen Rückblick über di recht schultere wirsh nid so schnell los! Und gnau die Bewegig führt dezue, dass der d'Stirn as Fahrerfenster hausch. D'Nadine hinderlaht uf jede Fall fliessig gueti Idrück und Abdrück adr Schiibe 😂

4 November 2016

Surfermekka Margaret River - Eine nachem andere stürzt sich da i di wilde Welle für en Fiirabigsurf und gebed es sehr beliebts Fotosujet ab. 🙃
Ab durs Dickicht zunre verstecktä Höhli. De Weg het sich devinitiv glohnt gha! Bewacht wird sie vome riese Bienenescht und vielne Schlange lut de Spure im Sand. Gseh hemmer leidr keini nume ghört weghusche im Gebüsch.
Dä Eukalyptuswald hesh scho was zauberhafts a sich!
Hamelin Bay - Uf dä Spure vo Stachelroche. Sobald is Wasser gstande bisch sinds uf di zuegstüret und bis zu de Füess ufgschwumme. Speziells Gfühl sone riese Ding hutnah a dir zha! 😊
Ufgwacht zmids im Regewald.

3 November 2016

Miitlerwile mummer sich de Po bevor mer ufs WC gaht mit Antibrumm ispreie, well mer susch sini Moskitobiss-Skala um einigi meh chan ergänze.
Gwüssi Ort gsend us wie z'England, z'Skandinavie oder grüeni Hügellandschafte wie idr Schwiiz. Spötistens wenn denn aber bunti Papageie oder sush was tropischs adr verbii flatteret odr gumpt merksh dass doch ame ganz andere, schöne Ort bisch^^
Teatime 😄
Gloucester Tree - Das isch de weltwit höchsti Baum, wo zur Brandusschau dient. Ä fini Leitere füehrt bis 53 Meter id Baumwipfel zunre Plattform ue.
D'Spure vom gestrige Waldbrand.
Dä lachendi Hans het en guete Morgä gwünscht.

2 November 2016

BBQ-Time: Hüt hemmer mal wiedr e richtig gueti Grillsession mit feine Fischfilet gha! A ziemli jedem öffentliche Platz finnsh en BBQ Grill, uh toll^^
Derf ich vorstelle: Min neu, huere geil charrä. 😉😎
Valley of the Giants - Ein riesigi, massivä Baum nachem andere. En Tree Top Walk hemmer welle mache und hend aber bim inelaufe zum Park grad wiedr chöne umchehre, well s'Gebiet wegeme Waldbrand evakuiert worde isch. Chum bisch usem Auto usgstiege hesh nacheme Rauchwürstli gschmöckt und bisch ime fine Ascherege gstande! Me gebed dem Ganze morn namal en Versuech. Für hüt simmer denn selber nachli abseits vom Brand umegschuenet und ga Bäum umarme. 😄
Elephant Rocks & Greens Pool - Ufm Rückweg hemmer na welle en WC-Stopp ilegge, wo ois eine druf ufmerksam gmacht het me sölled vorsichtig si er hegi ufm Männerklo grad ä Tigerotter gfunde. Denn hemmer si natürli welle ga aluege ish ja klar^^ Während oisere Klo-Wildlifetour hettr na erwähnt, dass da die 4. giftigst Schlange uf de Welt seg und wemmer bisse wird und nid so schnell wie mögli äs Gegegift zur Hand het, mausetod isch.
Otis, the happy dog!

1 November 2016

Hend grad Bsuech vo Kängurus, wo ois de Rase vorem Van mäied. 😄
Dä schön Usblick, womer gnosse hend, het em ufklebte Usruefezeiche uf sinre Lookout-Strassetafle alli Ehr gmacht.
Kängurus mached au e rech gueti Figur ufere Chuehweid. 😄

31 October 2016

Wave Rock & Hippos Yawn
From pink to green
Die Nacht hemmer zmids im stockdunkle Wald bide Kängurus übernachtet. Es Wiili vorane ish da na en Waldbrand dure und drum hets extrem nach Rauch gschmöckt gha. Nur d'Wärmi devo isch leidr nüm ume gsi und die hetted mer devinitiv brucht bi 7 Grad! 🙈

30 October 2016

Hüt hemmer Schwein gha! Hend es U-turn Verbotsschild ignoriert und natürli vome Polizist uf frischer Tat ertappt worde! De ish ois denn mit Sirene hinedrigjagt und het ois aghalte. Het ziemli ernst usgseh im Nachhinein hemmer aber selte sonen ufgstellte und nachsichtige Polizist erlebt wie ihn. De het Freud gha mit eus chli es Schwetzli zhalte und sis Dütsch z'teste und gfunde er heggi idr Schwitz ein Satz glernt und zwar was "getting drunk" heisst -> "sich d'Lampe fülle!" 😅 Zudem hettr ois namal druf ufmerksam gmacht, dass mer vorsichtig sölled si idr Nacht z'fahre weg de viele Kängurus es seged ebe nid die hellste Tier gnau wie d'Australier selber au nid 🙈(soo fiiis!) Er selber isch en Irrländer gsi... Denn hettr gfunde me heged zwar Regle da in Australie aber er drucki hüt es Aug zue! 😅
Back in Perth - Bin churz zu dem Bänkli gloffe öppe ä halbi Minute det gstande und vo eim aquatscht worde und miteme Visitechärtli usem Schwätz usecho, im Falle dass ich mich mal welli melde für es Tourguide Jöbli haha 😁👌🏼

29 October 2016

Oise Van stinkt sit em erste Tag so grauehaft usem Abfluss, dass di fash weghaut. Mal luege ob ois d'Campervermietig in Perth morn cha wiiterhelfe.
Geraldton - Idr Nöchi hets na en riesige Sportplatz samt Töggelichaste und elektronische Schnelligkeitsspiel (uflüchtendi Liechtli womer mu so schnell wie mögli berüehre) gha. En halbe Freiziitpark 😄 Da hemmer ois grad na es paar Duell gliferet!

28 October 2016

Monkey Mia - Anstatt ere türe, gfüerte Wildlifetour hemmer ois äs Kajak gshnappet de Pris abedealet und sind selber lospaddlet. En Tipp vom Vermieter hemmer na mit uf de Weg becho: "Hebed acht vor de Strömig, susht blasts oi uf Madagaskar abe. 😉" Ufem weg in Francois Peron Nationalpark hindere hemmer mehreri Schildchrote, Roche, Hai und en riesige Adler us nechster Nechi gseh! Spötr ishs denn na zume Wettlauf gege d'Ziit und de Wind cho zums oises Gfährt pünktlich zur Schlüssigsziit wiedr abzgeh. Ja me werded morn wahrshinli gspüre was mer gleistet hend 😅

27 October 2016

Versenkt! Me hend en namal uf d'Prob gstellt, aber es isch und blibt halt doch nur en Pseudo 4x4 Campervan...
Än seltne Dorntüfel ish ois grad über de Weg gloffe! D'Lisa hetten während de Fahrt ufem Highway mit ihrem Adlerauge entdeckt. Luschtigerwis het d'Nadine geschter na provezeit, dass mer hüt eine werded gseh und siehe da, da ishr. 😄 Vorallem ide Dämmerig und idr Nacht rennt, flügt odr chrücht so einiges über d'Strass. En Schnabeligel, e grossi Schlange und en Fischadler hend sich z'schnell usm Staub gmacht für mini Linse.
Bye bye Exmouth - Mir haueds wiedr durab in Süde.
Nach es paar Tag kei Duschi und mehrere Taucher im Meer, sodass mer us de Haar scho fasch chan afange Rastas dreie, hemmer ois überwunde binre Openair Strand-Duschi zmids idr Nacht Halt zmache und ä Bad-Session izlege. Woah het da guet tah! 😅
Geschter Nacht hemmer ame Strand, wo Schildchrote im Moment oft hichömed ga Eier legge, Wach ghalte idr Hoffnig eini z'gseh. E Schildchrot isch zwar leider keini uftaucht, defür sind ganz viel Chrebse am Strand umenandghuscht.
Termitebau, Vogelnescht oder doch en Stei? Meh wüsseds selber nid... Über recht e wiiti Strecke sind tusigi vonene verteilt gsi.
Wild campiere ish da im Weste nid so eifach! Es ish a wenige Plätz erlaubt sodass mer stendig uf chostepflichtigi caravan-parks agwiese ish. Nur blöd wemmer da nid will, nid brucht, sowiso scho viel z'spat dra ish idr Nacht zum ichecke und de negshti chostelose Platz zig Kilometer weg ish. Denn mummer eifach luege, dass mer, au ade abgschidnigste Ort, nid vome Ranger oder vo Awohner ertappt wird. Susch chas denn schnell mal tür werde!

26 October 2016

Witer ishs gange as Ningaloo Reef - En Ort, wo sich alli erdenkliche Meeresbewohner tummled. Nur scho einigi Meter vom Strand eweg chamer mit Schildchrote, Riffhai, chline, grosse, dicke, dünne, farbige, tropische Fisch ga schnorchle. Und wemmer sich bi schlechterem Wetter nid usegetraut, wie ich 🙈, denn chamer im seichte Gwesser am Strand au de schöne Roche hinedriwatä. 😊 Aber nid nur am Riff tummled sich vieli Tier, sondern au a Land lauft oder flügt immer wiedr was neus a ois verbi.

25 October 2016

Bin da grad im Meer bi Exmouth gstande und han de pinke Verfärbige vom Sunneuntergang zuegluegt, wo plötzli unmittelbar vor mir e Schildchrot ihren Chopf usem Wasser gstreckt het. 🐢
Witer ishs gange zu Coral Bay am Wendechreis "Tropic of Capricorn" verbi - Det obe hemmer en Halt gmacht für en witere Schnorchelgang im supr schöne warme Wasser. Am Strand acho het d'Lisa scho die erste grosse Fisch mit ihrem Toastbrot aglockt. Und da ish eigetli au s'best gsi wamer det gseh hend, wells en sehr stürmige Tag mit sehr milchiger Sicht undr Wasser gsi isch.

24 October 2016

Blowholes at Point Quobba - Wienen Geysir efach komplett ohni vulkanischi Aktivität. Da fegds d'Welle under em Fels dur mehreri Spalte id Höchi.
Under the sea 🐠

23 October 2016

Tageslektion: Es lebed dopplet so viel Känguru ufm rote Kontinent we Australier. Du hesh also die grösser Chance es Känguru z'gseh wenen local. ^^
Hamelin Pool and the Stromatolites
Little Lagoon at Australia's Coral Coast - Hai-sichers knalltürkises Gwässer 😉👍🏼
Hüt hani es wunderbars Kompliment vome Australier becho nachdem ich ihn gfragt han vo wo dassr chunnt -> Achtung: " Well you are definitely Australian right?" wuaa hahah 😍😄😏😌

22 October 2016

Delfin hutnah bi Monkey Mia. 🐬

21 October 2016

Shark Bay - Endli ishes warm! 😌👙Shell Beach het de nechsti Stop gheisse. En Strand, wo nume us luter wissä Muschlä bestaht. Ganz amächelig ish au s'seichte Wasser, womer sicher en Kilometer wiit is Meer ine cha spaziere. Hani denn au gmacht und bin öppe bis zur Helfti vodr Wade im Wasser gstande bisi gmerkt han, dassi gar nid ellai bin sondern vome ca. ein Meter lange Hai begleitet wird! De Landabschnitt erwist sim Name alli Ehr! 😅
A diä Morgäussicht chönnti mi glatt gwöhnä. ☀️

20 October 2016

Cheers!
Oisi neue Nachbärä
Ufm Weg in Kalbarri Nationalpark zum "Natures window" simmer mit oisem Pseudo 4x4 Campervan über d'Sandpiste gratteret, wuhuuu! Uf de hindere Sitz het mer grad es paar Freestyle-Sprüng higleit^^ I dene Pärk hets zwar fascht e kei Lüt defür Flüge en masse, wo sehr ahänglich sind und eim gern ufm weg begleitet!

19 October 2016

Ab in nechste Nationalpark. Endlosi Ussichte komplett für eus ellai! Nur de Wind pfift ois um d'Ohre und drum hemmer ufm einte Steg mit Windschatte e churzi Siesta igleit 😌 bevor mer ois wiedr as beobachte vome verbiziende Wal gmacht hend.
Think Pink!

18 October 2016

Hüt simmer im Nambung Nationalpark gsi bide Pinacles. Aschlüssend hemmer en wunderschöne Strand mit extrem türkisem Wasser gfunde und na es paar lässigi Sanddüne entdeckt mit extrem wissem Sand. De Sand het am Schluss absolut überall klebt!
Australie Pur! Kängurus hüpfed ois überall über de Weg und me hend bis ufn Meter as anne chönne! Ganz speziell ish, wenn e Horde a eim verbiigumpt! Und bide Koalas bini sowiso fash abe! 😍

16 October 2016

Da simmer d'Nadine am Flughafä ga abhole und hend di wartende Lüt chli amüsiert! Het es Wili brucht bis si eus erchennt het! 😄
Kings Park in Perth-En superschöne Park mit vielne exotische Pflanze und Vögel undere guete Ussicht uf d'Skyline vo Perth. Es ish so spannend, wasmer alles Neus kennelernt.

15 October 2016

Es ish sooo chalt in Perth!! Mir früred ois grad de Arsch ab! Die eint het gmeint nix mit Global Warming, es Global Freezing ish im Gange! 🙈
Ersti Abig, erste Pub und die erste paar Lüt kenneglernt. Da chunnsh so schnell is Gspröch und d'Lüt sind total offe und nett! Hend bereits en persönliche Kitesurfkurs, e warmi Duschi und e Unterkunft abote becho. ☺️ Me hend au erchlärt becho, dass mer da in Perth am Sunntig in Usgang gaht. Und es isch tatsächlich so. Samstig isch tote Hose und Sunntig full-house 🙈Ja au wenns am Mentig ga schaffe münd!
Ersti Sicht ufs wunderschöne Australie! Hüenerhutmoment! ❤️🇦🇺