Vietnam · 21 Days · 37 Moments · November 2017

Nadine & Cyp in Vietnam 2017


24 November 2017

Cu Chi Tunnel Während über 20 Jahr, no wiit vor em Vietnamkrieg mit de Amis, händ Vietnamese en über 250 km langs Tunnelsystem baut. Alles per Hand usghobe und budlet, nur mit Bambuswerkzüg. Total gits 3 Tunneltüfene, 2-3 m under Bode zum kämpfen, 4-5 m under Bode zum leben und 7-8 m under Bode zum flüchte in Mekong. d’Tunnels sind 80cm höch und 40cm breit gsi, für Touris händs es erwiiteret um je 20 cm.

22 November 2017

Kriesmuseum Ihdrücklich und truurig zugliich. Vo Panzer, Helikopter und Waffe, aber au en Nahbau vom Gfängnis uf de Con Dao Insle hät mer gseh. I me andere Ruum häts Dokumentatione und Bilder zu de Ahgriff vo Agent Orange gha. Es isch eifach grausig gsi, nid verständlich und ... eus fehled eifach d'Wort.

21 November 2017

Phu Quoc Zum Abschluss vo de Ferie hämmer eus no Strandferie gönnt und sind drum uf Phu Quoc. E Insle ganz im Süde wo mer au uf Kambodscha würdi gseh. Mir händ aber eifach mal nix gmacht. Sind umegläge am Strand, sind gsi go schnorchle oder Kajakfahre und händ fein gässe. Am einte Abig simmer no id Hauptstadt Duong Dong an Märt. Bevor mer go ässe sind hämmer dä schöni Sunneundergang gnosse und händ zueglueged, wies versuecht händ ufglaufene, beladene Boot zbewege... Es het denn nid klapped. Ganz schön farbig, blinkend sind Wiehnachtsbelüchtige da...

18 November 2017

Mekong Delta Am Namittag hämmer dänn nomal s'Böötli gmietet und sind uf de Mekong dur die viele verschiedede Kanäl gfahre. Eifach mega die Rueh, glasseheit vo de Lüht und Natur. Mir händ zig Eisvögel wieder gseh, immer im Flug, leider nie vor de Kammera...
Mekong Delta Und nomal... Fluet isch so stark, das mer da im nebed Fluss vom neben Fluss vom nebed Fluss vom Mekong, über 80 km Landiihwärts e mega Strömig gha hät, wos Wasser wieder Landiihwärts druckt hät... Und eifach überall häts Plastikschiffli oder au Müll... wie mer will...
Mekong Delta Und wells so schön isch, grad no meh Föteli...
Schwümmende Märt Am nögste Morge isch es am halbi 6i los gange zu de schwümmende Märt. Zig Böötli häts gha, wo d'Buure ihes Gmües und Frücht verkaufed, aber au Grosshändler mit überfüllte Bootli mit "nur" Ananas oder Kokosnuss druff...

17 November 2017

s'Huus vom Huynh Thuy Le Das alte chinesisch-französische Huus isch Huus gsi vom Huynh Thuy Le, eme Chines, wo mit de Marguerite Duras enere Französin, e Liebesbeziehig gha hät, aber irgendwie hetted die zwei gar nid därfe zäme sii. Viel Gold, Perlmuet und schöns Holz isch da verbaut.
Sa Dec In Sa Des simmer verschiedeni Gärtnereie go ahluege, über Blueme, Bäum und Orchidee häts eifach alles gha.
Xéo Quît Wald Als erst simmer en Urwald go ahluege, eigentli chent mer da uh schöni Wanderige mache, aber da alles dur de Rege under Wasser gstande isch, simmer nur mit em Böötli dur de Wald gfahre. I dem Wald häts au no Spure vom Vietnamkrieg, Schutzbunker und au Bombelöcher hämmer gseh.
Cyp sin Geburri Zum Geburri hät Nadine ihre liebi Schatz mit eme Usflug id Natur überrascht. Und da sie ja weiss, das ihre Schatz nid so uf Blingbling und "im Mittelpunkt sii" staht, hät sie au nid meh organisiert. Aber s'Hotelpersonal hät so Freud gha, dass sie ihm e Geburritorte organisiert händ...

16 November 2017

Reise in Vietnam Öb mit em Touribus oder mit de offizielle Fernbüs, Reise uf de Strass in Vietnam isch super spannend. Da s'Bruggefundament mit Sand ufgfüllt wird, gheit de Belag vor und nach enere Brugg so fest zäme, das mer mega Speedhumps überchunt oder wend mit em Roller drüber fahrsch richtig Jumpe tuesch. d'Flughäfe mit de Inlandflüg sind au super, super günstig, mer lauft über Rollfelder ine und Vietjet Air isch schei***, aber däfür häsch was für Aug, Stuardesse händ Hotpants ah...

14 November 2017

Riiswii Zum Schluss simmer no e Riiswiidestillerie go ahluege. De Riis wird zerst koched und denn abküehlt. Nachher chunt er is Fass mit Wasser bis alles gäred. Und denn wird die Brüehe destiliert. Under anderem brucht mer de Riiswii denn au für Schlangeschnaps. Je grösser Schlange im Glas isch, je türer isch de Schnaps.
Siedefabrik Mir sind denn no e Siedefabrik go ahluege. Da werded Motte züchted wo Eier leged, denn schlüpfed Rauppene. Irgendwenn verpuppet sich die Raupene im Siedekneuel und de Kokon wird denn für Siedeproduktion gnutzt. d'Kokon werded im heisse Wasser koched und denn wird de Siedefade ufspuelet. Und mit em Siedefade wird denn gwebt. Ein Kokon spendet bis zu 600 Meter Siedefade.
Elefanten Wasserfall Glitschig, dreckigs Wasser und viel Abfall...
Holzhüüser In Vietnam gits über 54 verschiedeni Dialekt. Da i de Region um Da Lat wohned hauptsächlich K'Ho. Die ursprüngliche Holzhüüser sind ohni Feister baut worde und au die ahbauti Chuchi isch erst viel spöter däzue cho. Luht Qui - eusem Easy Rider - hät mer Chuchi ahgfange separiere, wos Schuele gäh hät. Damit d'Chind di Heime Huusufgabe ohni Rauch i de Auge chöne mache.
Kaffiplantage Uf dere Plantage wachsed 3 verschiedeni Bäum, Arrabica, Mokka, Robusta. d'Blüetene vo de Kaffibäum duftet mega fein. In Vietnam wird au de Wieselkaffi ahbaut. Da wärded Kaffibohne am Wiesel zum Fresse gäh, mer warted bis Wiesel die Bohne wieder usschiisst und dänn tuet mer die Bohne röste. De Kaffi isch de türsti vo de Welt!
Ussicht uf Da Lat Underwegs us de Stadt use hämmer irgendwo ghalte und sind uf de Berg ufe gloffe. Vo da hämmer e mega schöni Sicht über Region gha. Grad unde drah, häts no e Orchideefarm gha.
Drachen Pagode Als erst hämmer a de Drache Pagode ghalte. Vietnamese händ bis vor 1000 Jahr kei Religion gha. Als erst sind dänn Chinese cho mit em Buddhismus und spöter, dur die französischi Bsetzig, hät mer Katholismus bracht. Hüt isch Bevölkerig, je nach Region, mal eher buddistisch oder katholisch.
Easy Rider Gester simmer uf de Strasse vo Da Lat vom Qui ahgsproche worde. Er isch sit über 20 Jahr en Easy Rider und begleited Touris mit em Töff. Eigentlich sitzt mer bim Easy Rider hinde druff, doch de Qui isch so nett gsi und hät für eus en eigene Töff organisiert. Die Chance hämmer gnutzt und händ mit ihm ein Tag buecht. Am morge Früeh isch er mit 2x 150ccm Hondas eus im Hotel go abhole cho und mir händ mit Ihm Gegend um Da Lat ahglueged. Es hät mega spass gmacht und de Qui hetti Eus am liebste no wiiter begleitet.

13 November 2017

En chliine Regeschauer Wo mer gmüetlich dur Da Lat gfahre sind hets chli ahgfange Fieserle - kennemer ja, hört grad wieder uf - denkste! Es hät so fest abepisst, das mer irgendwo drunderstah händ müesse und über e halb Stund hämmer gwartet.
Da Lat Railway Station De historischi Bahnhof isch no als Museumsbahn in Betrieb, keine weiss aber, wenn das de Zug fahrt... Mir händs leider nid usegfunde. Früehner sind mal 4 Zahnradlockene vom Furka da in Betrieb gsi, aber mit em Wiederbelebe vo de Furkabergstrecki hät mer zwei vo dene Lokene wieder zrugg kauft...
Crazy House Eifach nur crazy 😳😂 d'Bsitzerin isch das verruckte Huus stetig am erwiitere. Über zig Brüggli - teils mit "Gländer" wo nid höcher als Fuesschnöchel sind - sind d'Hüser und Zimmer mitänand verbunde.
Da Lat Da eus Nha Trang nid gfalle hät, simmer grad am nögste Morgefrüeh mit em Bus wiiter id Berge uf Da Lat. d'Hiireis isch über zig Päss und Kurvene gange und mir händ vom Unwetter wo vor öppe 3 Wuche gsi isch no ganz viel Spure gseh. Ganzi Berghäng wo abe cho sind. Es hät e chli a Bondo erinneret... Da Lat isch DAS Gmüesfeld vo Vietnam. Eis Triibhuus am andere... Gewaltig...

12 November 2017

Nha Trang Vo Ninh Binh isch es jetzt in Süde gange, uf Nha Trang. Zerst mit em Bus zrugg an Flughafe vo Hanoi, denn mit em billigste Flüger uf Nah Trang. Nha Trang hetted mir zwei glaub gschieder us lah. Nur Russe - es hät nämli e direktverbindig vo Russland und Nha Trang isch wie de Ballermann für üs 😬

11 November 2017

Trang An Uf Wunsch vo de Nadine, het de Cyp doch no "müesse" uf es Touri-Boot-Tour mit. Es hät sich aber usegstellt, das es wunderschön gsi isch. Und die viele Touri-Böötli ganz am Start sind zum Glück nid alli mit eus underwegs gsi. Meistens simmer ganz ällei uf em Wasser gsi, händ Natur gnosse, die wunderschöne Iisvögel - wo überigens super flink sind und fast nid vor Linse bringsch - Hölene und e Art Taucherli.
Bird Valley De Schock isch gross gsi, wo mer im Bird Valley ahcho sind und zig Schuelklasse gha hät. Es het sich denn aber usegstellt, das es uf dem Gländ no e grossi Sportwiise hät und die Kids, bi schwülwarme 35 Grad über de Mittag 😳 Sportunterricht gha händ. Mir sind wiiter hindere gloffe, bis mer ändli die schrecklichi Techno-Vietnamesischi-Musig und über Mikrofon d'Ahwiisige nümme ghört händ. Denn isch es endli schön ruhig worde, mir händ zig Vögel ghört, aber uf Linse hämmer nur d'Kranich und es paar Schmetterling bracht.

10 November 2017

Bia Dinh Pagode d'Bia Dinh Pagode isch en riise Komplex mit über 500 Budah-Statue, viel Gold und Klimper. Irgendwie verlührt die ganzi Pagode mit ihrne grosse Budah-Statue etc ihri Würkig, wenn mer weiss, das die Pagode erst 2014 fertig baut worde isch.
Van Long Nationalpark Im Van Long Nationalpark simmer denn doch uf so es Böötli gstiege, zum Glück ohni Weste und viel weniger Touris. Mir händ denn grad am Ahfang Affe gseh, uf de Föteli nid so guet erkennbar... Au Iisvögel häts gha, mega schön und endli ruhig. Kei Töffli, Strasselärm und gehuupe...

9 November 2017

Tam Coc Am erste Namittag hämmer vo eusem Homestay en Roller gno und sind uf Tam Coc gfahre. Da hetted mir mit de Böötli chöne go fahre, aber die wo eusjkenned wüssed, das mir nid so Touri-Abzocke-Usflüg stönd. Sind denn eifach chli dur das Käffli gspaziert...
Ninh Binh Vo Hanoi us isch es am morge mit em Bus wiiter uf Ninh Binh gange. Das isch die trocheni Halongbay mit Kalkberge und viel Wasser. Öppe 10 km vor Ninh Binh hät de Bus gstoppet und "eus" 3 One Way Passagier uf Strass gstellt. De Bus würdi jetzt da abbüge mit de restliche Lüht für Tour und mir 3 sölled da usstiege und uf es Taxi warte, es chunt denn scho irgendwenn eis... Irgendwie hämmers denn gschafft und de Tourbus hät eus denn doch no es Stückli mitgno und mir händ dänn anere Pagode därfe usstiege wos au Töfftaxis gha hät.

8 November 2017

Mir händ dänn am Morge druf eusi Tour abbroche, händ zerst no e neui Zündkerze kauft, montiere lah mit Sekundeliem, well sie suscht immerno gwaglet hät und sind de gliich Weg zrugg uf Hanoi - 150 km, über 6h, well de Motor grad abgstellt hät, sobald er Kraft hät müesse ufbaue. d'Gegend wo mer gfahre sind isch uh schön gsi. Riisfelder, Gmüesgärte, Kalkfelse, Wasserbüffel, Fournierbrettfabrike und natürli d'Hauptstrass uf China. A Eus sind 40 Tönner mit viel gehupe verbiitonneret...

7 November 2017

Am Abig simmer als "Attraktion" dur Lang Son glofe uf de suechi nach em Znacht... Echt schwierig so ohni Vietnamesisch... Händ denn e Kochnische gfunde, wo mer mit Fingerpointe, bitz englisch, kopfschüttle, lächle en Znacht übercho händ.
Honda Win 100 Voller Stolz simmer am Mäntig Abig is Bett, mir händ eus nämli für 5 Täg e Honda Win 100 gmietet. Am nögste Morge isch es losgange. Adventure Büro vo de Vermietig hät eus de Töff direkt as Hotel bracht, Täsche montiere und ab dur de Strassewirrwar vo Hanoi richtig Lang Son. 150 km sind ahgstande... Tja, dänn ernüchterig, nach 100 km stellt de Motor ab. Irgendwie isch er nomal ahgsprung doch kein Kilometer spöter wieder tod. Jetzt hämmer gseh, irgendwas mit de Zündkerze isch kaputt - sch... Töffli schiebe, nach em Weg fröge mit Händ und Füess und nach 2 km hämmer doch en Mech gfunde. Er hät eus denn en neue Zündkerzestecker für 1.- montiert, plus no Reife pumpet. d'Irrfahrt isch leider wiiter gange, so das de Motor alli 5 km abgstellt hät. Eusi Abentürlust isch vergange, mit kälti und Nieselrege als Dankeschön... In Lang Son ahcho, Hotel gsuecht und zerst mal warm go Dusche.

6 November 2017

Hanoi Alles lebt, alles Bewegs sich, nüht staht still. Gewaltig die Ihdrück... Bild 1 & 2 Strasseverkehr in Hanoi. Rikscha's, Töfftaxi, Roller, Autos, Bus und natürli Fuessgänger. Wichtig, ja nid stahbliibe uf de Strass bim überquere, immer im Fluss bliibe dänn passiert au nix 😳 Bild 3 & 4 d'Ihsebahn gaht zmitts durs Wohnviertel oder sind Wohnige direkt ad Gleis baut? Bild 5 & 6 Hoa-Lo-Gfängnis oder wies im Vietnamkrieg gheisse hät: Hanoi Hilton. Ursprünglich mal für 450 Gfangeni baut, häts während em Krieg fast 2000 Gfangeni gha.

4 November 2017

Über den Wolken, muss die Freiheit wohl grenzenlos sein...
Packt und parat, jetzt muess es nur no an Flughafe gah...