Europe, South America, North America · 81 Days · 91 Moments · January 2017

Marina's Urlaub in Kolumbien


18 April 2017

Hüt isch de letschti volli Tag in Panama und vo minere 3- monatige Reis. Mir hend hüt e Katamaran Tour gmacht. Isch super gsi mit guete Musig, z'ässe und Getränk. De Strand isch nöd bsunders schön gsi, aber Katamaran Tour hets usgmacht. Am Abig simmer fein go Esse im Restaurant Caliope.

17 April 2017

Mir hend den innere coole Bar no en chüele Drink gno und innere Cervezeria es paar Bierli probiert. Isch en super Tag gsi.
Hüt Morge simmer direkt zum Panama Kanal, Miraflores gfahre und hend d'Schleuse und de Kanal, wo die riese Schiff durefahred beobachted. De Kanal isch 1914 fertig baut worde, 40'000 Arbetschräft hets brucht, zum de riese Kanal zbaue. Total isch de Kanal 80 km lang und wird 24h betriebe. D'Schlüssene sind so tüf/höch wie es 10 stöckigs Gebäude. Nacher simmer mit em Touribus no i die Altstadt gfahre und hend eus Casco Viajo no bi Tagesliecht agluegt. Es het mich sehr a Cartagena erinneret, mit all dene farbige Hüsli im Kolonialstil, sehr herzig❤️👍🏻.

16 April 2017

sWiederseh mit de Nadine isch supii gsi, mir hend eus einiges z'verzelle gha. Hüt simmer am Tag chli an Pool und hend chli gsünnelet und den simmer i die alt Stadt ine schöni Rooftopbar und no fein go esse.

12 April 2017

11 April 2017

SAN BLAS INSLE - DAS PARADIES☀️🌴 Eis vo mine beste Erlebnis, isch definitiv die Katamaran Tour ide San Blas Insle gsi. Eifach en Traum... Jede Tag Meer, Sunne, wunderschöni Insle, Palme, Sandstränd und Sunneuntergäng.

10 April 2017

Nach fast 3 Mönet ohni high heels 👠 & diverse Hostels, hani hüt voller Freud im moderne Hard Rock Hotel in Panama ichecked. Puuuure Luxus✨💫. Mis Zimmer isch im 21. Stock mitere super Ussicht. Zum Znacht hets en feine Burger und en Maracuia Margaritha ghe. Has mir guet gha la😊😊😊😊. Morn wirdi am 5i am Morge abgholt, freu mi uf mini Katamran Tour ide San Blas Insle.

8 April 2017

Hüt Morge bini uf de Berg Monserrate wo 3'150m höch isch (Bogota isch uf 2'500m). Mit em Bähnli isches steil de Berg duruf. Dobe hets e Chile und natürlich e Ussicht über die 8 Mio. Iwohner Stadt. Leider hets soo viel smog ide Luft gha, dass mer nöd sehr wit gseh het. Nacher bini no is Goldmuseum, isch gröschte vo ganz Südamerika. Am Abig bini mit de Jaqueline us Brasilie, wo au i mim Hostelzimmer isch, no go esse und öpis go trinke. Isch en mega coole Abig gsi mit ihre.

7 April 2017

Nach de Graffiti Tour hemmer no e Bierbrauerei tour gmacht. Mir sind 4 chlini Bruereie go ahluege und hend natürlich immer chöne probiere. Ha nacher kei Bier me chöne gseh😂.
No paar Graffitis me...
Am 14:00 simmer ad Graffiti tour, het wieder uh schöni Graffitis gha.
Am Morge am 10:00 hani mit em Kanadier "Free walking tour" in Bogota gmacht. Isch mega interessant gsi. Mir sind au no churz is Museum vom Simon Bolivar, wo für sini dicke Figure und Bilder bekannt isch.

6 April 2017

Ich bin hüt guet in Bogota acho und Sunne het sogar gschune. I mim 6er Schlag isch nur no en Kanadier wo bi de Army schaffed. Mir sind den zäme ime coole Resti go Znacht esse. Ha scho e liechti Erchältig, es isch recht chüel im Verglich zu de Küste wo ich herchume. Bi mit de Lederjagge und Schal use. Freu mi scho uf Panama, wieder ad Wärmi☀️.

5 April 2017

Nach nur 4h Schlaf hanis hüt gmüetlich gno und de Tag am Strand i mim Hostel verbracht. All mini Stich hend sich i juckendi Blötterli verwandled. Es het mich i de Nacht dermasse bisse, dasi nöd ha chöne schlafe. Hoffe die Nacht wird besser, hüt schlafi nomal ime chline Bungalow am Strand. Morn gahts nach Bogota. Am Abig hemmer "shit hut" es chartespiel gspielt, wo Monika vo de Slowakai eus zeigt het.

4 April 2017

Die erste zwei Föteli sind no vom Campingplatz, mit ganz eifache Duschene und WC. Den simmer anen schöne Strand und hend det de Namittag verbracht. Geg die 3 simmer ufbroche und hend Tour abgschlosse. Isch astrengend aber schön gsi. Mitgno hani jensti Muggestich und Sandfly stich, jupiiiii😆😆.

3 April 2017

Am Mäntig simmer 5te in Parque Tayrona. Natur isch uh schön, aber es isch soooooo heiss und füecht gsi, ha scho lang nüm soviel gschwitzt. Mir sind a Stränd verbi und hend den im Park au übernachted, zweite im Zelt.

2 April 2017

Am Sonntig bini am Costeño Beach, im Hostel la brisa tranquilla acho. Isch direkt am Strand mit vielne Palme, uhhhhh schön. Die erst Nacht hani i dem chline "Boungalow" übernachted, alles sehr offe ohni Tür, aber isch guet gange mit Muggenetz. Me muss da die eigene Asprüch chli abeschrube😂. Bi nöd ganz allei gsi, Chatz ufem Foti het au i mim Bett gschlafe, aber usserhalb vom Muggenetz.

1 April 2017

Hüt Namittag bini wieder zrugg nach Cartagena cho. Ich bliebe no ei Nacht da und morn Morge gangi Richtig Santa Marta, ha aber es Hostel direkt am Strand gno, nöd ide Stadt sälber. Isch min letschte Stopp in Kolumbie ade Wärmi. Den gahts no 3 Täg nach Bogota und den richtig Panama.

31 March 2017

Hüt bini uf de "Isla Grande" für ei Nacht. Ha es mega herzigs Hüsli verwütscht, sehr eifach aber gmüetlich. Stränd sind nöd überragend, aber s'Wasser isch uh schön. Am Abig gahts no uf e Plankton-Tour, de Plankton sött i de Nacht lüchte, bi gspannt.

30 March 2017

Am Dunnstig bini miteme Mexikaner, ere Brasilianerin und em Holländer zume andere Strand. Hend dadefür es Boottaxi gno und sind 5min uf die ander Site gfahre. Wasser isch schön blau gsi. Uf de andere Site in Cartagena hets richtig starch agfange regne, mir sind devo verschont bliebe. Geg di 17:30 simmer ine Bar go de Sunneundergang go gnüsse. Es isch leider bewölkt gsi, aber es het wunderschöni Streife im Himmel ghe. Am Abig simmer den 7te (all vom Hostel) go esse. Ha all i das Restaurant mit de feine Pasta mitgno, isch super gsi. Isch en mega coole Tag gsi mit dene vom Hostel. Unglaublich wieviel Lüt ich uf dere Reis kenne lerne.

29 March 2017

Hüt bini am Playa Blanca gsi, isch ca. 70min vo Cartagena entfernt. s'Wasser isch richtig schön klar gsi, nur de Strand isch chli überfüllt gsi mit Hostels. Zum Zmittag hets en mega feine Fisch ghe. S'chline Chätzli isch plötzlich uftaucht, sooo herzig gsi😍.

28 March 2017

Am Dienstignamittag bini in Cartagena acho und han mich direkt i das Städtli verliebt. Ha glaub no nie so öpis schöns gseh, es isch en Traum us vielne farbige Hüsli im kolonialstil, eng anenand baut. S'Klima isch sunnig, warm/heiss mitere liechte Briese. Cartagena het früehner sMonopol für de Sklavehandel gha. Da sind einigi schlimmi und trurigi Sache passiert. Ha während de Free walking tour no eini vo Tschechie kenne glernt. Sie het mir no es anders Viertel vo Cartagena zeigt wo viel Lokali Lüt wohned und au viel Backpackers het. Au ganz herzig, mit vielne Graffitis. Im Hostel hani den wieder öper vo Medellin troffe, so lustig wie mer immer wieder Lüt atrifft.

27 March 2017

Hüt bini zu de "Cascadas Juan Curi" gfahre und ha mir de 180m höchi Wasserfall agluegt. Es het richtig tosed vo dere riese Wassermängi wo obe abe cho isch. Nacher bini no in Park "El Gallineral" wo für sini Bäum mit de lange wisse Fäde bekannt isch gange. Am 4i hani de Bus nach Bucaramanga gno.

26 March 2017

Hüt Morge hets ufem Dorfplatz en grosse Märt ghe und nebetzue het e kolumbianischi Musiggruppe gspielt. Am 10:00 isches zum Canyoning gange, mir sind nur 3te gsi. Hend eus vo 6m, 8m und 20m abgseilt und es het zwei Sprüng vo 3m und 6m ghe. Ich han allerdings de Sprung vo 6m uslah, willi nach mim Sturz uf de Rugge no zviel schlechti Erinnerige i mir gha ha, und darum entsprechend zuviel Respekt. Ha nüt welle riskiere. Es isch cool gsi, aber de Fluss het komischerwies fast kei Wasser gha, isch daher alles chli "troche" gsi. Uf di 14:00 hani no de Bus nach Barichara gno, es chlises herzigs Städtli, mit wisse Hüsli. Bi jetzt aber nach dene zwei Adrenalinusflüg recht kaputt.

25 March 2017

Gestermorge hani gmüetlich Zmorge gässe uf de Terrasse und bi den chli sStädtli go ahluege. Het en grosse Früchtemarkt gha, wo ich den en frische Fruchtsaft gno ha und jensti anderi Lädeli. Am 12:30 bini zum Riverrafting abgholt worde. Isch mis 4. mal wo ich das mache. De River het sehr viel Wasser gha will grad Rägezit isch. Wooooow das isch also richtig ab gange, mir sind teilwis i so grossi Welle und Strudel inecho. Boot isch mängisch mit Wasser überlofe und einisch hets fast Boot keehrt. Adrenalin puur, isch richtig zur Sach gange. Isch bis jetzt die krässischt Riverrafting tour gsi. Am Abig bini no mitere Kanadierin wo ich im Hostel agsproche han eis go trinke. PS: Sobald ich Riverraftingföteli vo de Tour bechum, duenis is journi.

24 March 2017

Hüt isch en strenge Tag gsi obwohl ich nöd viel gmacht han. Bin am 9ni am Morge ufs UBER Taxi in Richtig Aerport Cali. In Bogota hani en Zwüschestopp gha und s'Terminal müsse wechsle. Zum Glück hani nomal gfrögt wo ich ane muss, het suscht glaub de Flug verpasst, isch alles sehr knapp gsi mit em Aschlussflug. In Bogota hets in ströme gregnet, bi jeder zwüschelandig wo ich bis jetzt in Bogota gha han (3x) hets in Bogota gregnet. Glücklicherwies isches den in Bucaramanga schöner gsi. Ha mi den uf Suechi nacheme Bus nach San Gil gmacht. En hilfsbereite Taxichauffeur het mi zum Terminal gfahre isch extra mit mir usgstiege zum es Billet chaufe und het mer Gepäck treit. Busfahrt isch den nomal 2.5h gange, bi schlussendlich am 6i am Abig acho. Ha es herzigs Zimmer für mich und gnüsses grad richtig. Hüt gits nach 3 Abige Usgang en gmüetliche Abig. Ha no en feine Burger gässe und liese jetzt no bitzli.

22 March 2017

Gestermorge hani e Citytour dur de historisch Teil vo Cali gmacht. Die gross Chatz isch ufgrund vo de viele Obdachlose und viele streunende Chatze erstellt worde. Damit die gross Chatz nöd allei isch, het mer 2010 witeri Chatze erstelle la. Jedi Chatz het ihri eigeni bedütig, git glaub total 19 chatze. Eus isch gseit worde, dass für Erstellig vo de erste Chile (die ganz in wiss) für de zämehalt vo de Ziegel folgendi Materialie verwendet worde sind: Kalk, Eierschale, Tierbluet und Sklavebluet, ganz krass. En Usschnitt vo de Mur gseht mer ufem Foti. S'Wahrzeiche vo Cali isch eigentlich die blau/wiss Chile wo vo de Struktur an Kölnerdom sött erinnere. v
Vo 4-7 am Namittag hani no e zweiti Citytour gemacht, det simmer no zum Christo ufe uf ca. 1'300m. In Südamerika gits total 3 Christos, de bekannt in Rio de Janeiro, in Lima in Cali. Jetzt hani bereits scho zwei devo gseh☑️😉. Am Abig simmer zerst ine Salsaschuel go tanze den wieder in Salsaclub und hend sTanzbei gschwunge. Es het soooooo gueti Salsatänzer/inne da💃🏻💃🏻💃🏻.

21 March 2017

Am Dienstigmorge hani de Bus zerst nach Armenia(1h) und nacher nach Cali (3h) gno. Im Bus nach Cali bini glaub die einzig Touristin gsi, aber ich han die Busfahrt total gnosse, natürlich mit Musig ide Ohre.... Im Backpacker acho, bini direkt an Pool. Am Abig isches no inen Salsaclub gange. Lüt vo Cali hend en andere Salsastil wie die vo Medellin, isch en coole Abig gsi mit viel "Salsa moves". Aber ich fühl mich i dere Stadt nöd ganz so sicher wie in Medellin, me seit au, dass Cali gföhrlicher isch. Vorem Salsaclub hends versuecht Kokain z'verchaufe. No thanks....

20 March 2017

Hüt morge simmer ufe Kaffifarm und hend det e Tour gmacht. Kolumbie isch nach Brasilie und Vietnam 3. gröschte Land wo Kaffi produziert. Isch spannend gsi und de Kaffi zum probiere gar nöd mal so schlecht, für e "Nicht-Kaffitrinkerin". Am Namittag hani no e "Horse riding 🐎" Tour gmacht, nur de Guide und ich. Isch super gsi. Am Abig bini mit em Josh no go Fisch esse und spöter no go Billiard spiele. Mini Zimmerkompanin isch au no dezuegstosse.

19 March 2017

Mini erst Nacht im Hostel isch sosolala gsi, teile zwar Zimmer nur mit einere Französin, aber es isch immer irgendwo lut gsi. Mussmi zerst wieder dra gwöhne. Hüt simmer ines Thal "Valle de Cocora", das isch für die längste Palme ide Welt bekannt. Natur det isch wunderschön. Mir sind fast 7h unterwegs gsi, hend eus au no 1h verlaufe, will praktisch nüt beschilderet gsi isch. Zum Glück han ich im Hostel Gummistiefel gmietet, dWeg sind voller Match gsi (siehe Foti vom Josh sine Schueh). Es isch e mega strengi Wanderig gsi, mir sind bis uf 2'820 Meter gsi. Ufere chline Farm hemmer no Kolibris gseh, so herzig. Im "Dschungel" hemmer jensti waggligi Brüggli überquert. Geg de Schluss hemmer nur no welle acho, wills afa regne het und es isch immer eine meh im schlamm usgrutscht, will mer so kaputt gsi sind und chalt gha hend. Isch aber e super schöni Tour gsi👍🏻🌴🌴🌴.

18 March 2017

Am Samstigmorge (18.3.2017) hani de direkt Bus nach Salento gno, isch ca. 6h gange bis mer acho sind. Es isch so e kurvigi Strass gsi, dass mer fast schlecht worde isch, aber has überlebt😄. Salento isch es mega herzigs, chlises Dörfli, het mich chli a Guatapé erinneret mit all dene farbige Hüsli. Es het uh viel Lüt, will am Mäntig en Fiirtig isch. Am Abig bini mit em Josh und em Kimi (kenne die beide vo Medellin) no go Znacht esse und eis go trinke.

17 March 2017

5 Wuche Schuel, 5 Wuche Homestay mit de Blanca und 5 Wuche wunderschöni, lustigi & erlebnisrichi Moment, hani ich in Medellin döffe erlebe. Hüt isch min letschte Tag in Medellin gsi und es fühlt sich irgendwie komisch a, mis "zweite dihei" wo ich mich vo Afang a so wohl gfühlt han, z'verlah. Ich freu mich aber uf mini witeri Reis und bin gspannt was alles no cho wird.🙌🏻🇨🇴💃🏻☀️👣🍹. Ufem erste Foti isch Blanca, mini "Homestay-Muetter", ufem zweite Foti ihri Tochter und ufem dritte Foti mini beschte Moment in Medellin.
Ha hüt nomal en super Tag gha, mir sind Chind go bsueche und hend mit ihne gspielt. Eltere vo dene Chind sind teilwies sehr arm, es fehlt a allem, oder sie wachsed innere Umgebig mit Gwalt, Droge und Problem uf. Es isch unglaublich gsi, was für e Herzlichkeit die Chind hend. Ha glaub no nie i mim Läbe soviel Umarmige becho wie hüt. Jedes Chind het eim umarmt, nöchi gsuecht oder eim stunend agluegt. De Bueb ufem Foti het mit mir e Aktivität welle mache. Wenn ich mit ihm gredet han het er mich immer "Seniora" gnennt, so herzig. Er heisst Derwin isch 11i und het 5 Gschwüsteri. Mir hend Ufgab gha, mit Chnätti es Gfühl zmodeliere, mir hend Unsicherheit zoge. Es isch so e wunderbari Erfahrig gsi mit dene Chind.

16 March 2017

Gester nach de Schuel hani die dritt Luftseilbahn in Medellin gmacht. Die isch ca. drümal de Berg uf und durapp, isch super gsi mitere mega Ussicht. Die Seilbahn isch für mich die Schönscht gsi. Am Abig simmer no ine Bierbrauerei "3 Cordilleras" und hend det paar Bier trunke, het sogar es grüens ghe, wegem St. Patricks Day. Nacher simmer no in Parque Ileras chli go tanze, isch lustig gsi💃🏻🙌🏻🎉

15 March 2017

Hüt Abig isches is Stadion: Atanasio Girardot in Medellin gange. Die argentinisch Mannschaft, River Plate het geg DIM Medellin gspielt. Wetter isch jedoch dermasse schlecht und regnerisch gsi, dass mer nach de erste Halbzit hei sind. Stimmig isch trotz Räge bombastisch gsi und Kolumbianer hend ihri Mannschaft richtig agführed. Leider het River Plate schlussendlich 3:0 gwunne😔👎🏻.

14 March 2017

Gester Abig isch wiedermal Intercambio gsi und danach simmer no witers im Parque Ileras öpis go trinke. Mir sind wieder e gmischti Gruppe vo Kolumbianer und Touriste gsi, so dass mer au chli zum spanisch rede cho sind.

12 March 2017

2. Teil vo de Pablo Escobar Tour
Hüt hemmer e Pablo Escobar Tour in Medellin gmacht. Mir sind zerst zu sinere Grabstätte gfahre, denn zu "la Catedral" wo er sis eigene "Gfängnis" baut het (Deal mit de Regierig), det isch er zwei Jahr bliebe und isch nacher gflüchtet.

11 March 2017

Am Samstig het Sunne leider nur ca. 2-3h gschune, bi denn no churz an Pool go sünnele. Nacher bini i min lieblings mercado go Tapas, Sangria und en Nutella Crep go gnüsse. Ha den es mega herzigs Kaffi um de Egge gfunde wo ich Tee trunke und gmüetlich mis neue Buech gläse ha. Am Abig bini ime kolumbianische Salsaclub go Salsa tanze. Es het sogar e Live-Band gspielt 💃🏻🇨🇴.

10 March 2017

Endlich isch Fritig worde, bi sooo froh gsi wo Schuel ume gsi isch. Bi i dere Wuche anen Punkt cho wo ich echt überforderet gsi bin, ufgrund dessen, dass di andere vo de Klass besser und scho witer gsi sind. Wirde darum nächst Wuche inne anderi Klass gha. Am Namittag bini i eis vo de schönste und gröschte Shoppingcenter in Medellin gange, is "el tesoro". Das isch riesig und wunderschön, dusse hets sogar no en grosse Park für Chind mit Rieserad und Bahne. Als ersts hani mir e Portion Nachos bstellt, ha en rieeeeeese Teller becho. Bi den chli dur dLäde und ha einiges kauft. Jetzt döffi nüm go shoppe suscht hani problem mit em koffer🙈. Nachem Znacht bini no go salsa & bachata tanze und den in Usgang mit 2 Schwizer. Mir sind dasmal inen Club, wo obe offe gsi isch und de Mond gseh hesch, uhhh schön.

9 March 2017

Am Donnstig hets uf de Strass wieder e Gruppe vo Strasseakrobate gha. Immer wenns rot isch macheds e Vorfüehrig. Vo 6-8 am Abig isch wieder Intercambio gsi. Am mim Tisch hets zwei Kolumbianer gha und en Kanadier (de Älter Herr). Nacher simmer no witers öpis go trinke und esse. Bi a dem Abig oft zum spanisch rede cho und es isch nöd mal so schlecht gange😊.

8 March 2017

JUPIIIIIIIII hüt hets nach 3.5 Wuche Homestay zum erste mal PASTA ghe und kei Riiss🙌🏻🙌🏻🙌🏻🙌🏻🎉🎉🎉🎉🎉🎉🎉😂😂😂😂

6 March 2017

Hüt het Schuel wieder agfange. Bin mit 3 Amerikaner ide Klass, zwei devo sind Pensioniert. Ha aber no paar ander Lüt känne glernt unter anderem au Schwitzer. Nach de Schuel bini ich is TRX, was wieder mal sehr astrengend aber guet gsi isch. Ufem Heiweg hani ufeme Markt no es herzigs wisses Chleidli kauft. Wo ich ha welle zahle seit Verkäuferin, dass ei Note "gfälscht isch" nöd echt. Ich bi natürlich grad chli verblüfft gsi, dass ich Falschgeld bi mir han. Has den dihei minere Homestay Muetter verzellt, sie hets nomal bestätigt und mir zeigt, uf was ich luege söll. Wichtig isch, mit em Fingernagel übers Papier zfahre, det gspührt mer e gwüssi Wellestruktur wenns echti Note sind. Gemäss ihre hani die "Blüete" sicher vome Taxifahrer becho wo oft bschiessed. Wirde jetzt mis Retourgeld sicher besser prüefe. Ha es Foti gmacht vo dere "Blüete".

4 March 2017

De Donnstig isch de letschti gmeinsami, ganzi Tag in Rio gsi. Mir hend eus au in Rio nomal in Touri-Bus gsetzt, wos erst sit churzem git. Nach de Tour simmer chli in Ipanema de Shoppingläde entlang glofe und hend eus nacher am Strand im chüele Meer e Erfrischig gönnt. Geg de spöter Namittag sind grossi schwarzi Wulche uftaucht und en richtig grosse Sturm isch usbroche. Am Abig simmer fein go Italienisch esse und hend in Lappa de letschti Drink gno. ES ISCH SO E LÄSSIGI ZIT GSI IN BUENOS AIRES, MONTEVIDEO UND RIO DE JANEIRO😍🍹💃🏻.
Das Wucheend hani nöd viel gmacht, bin a am pool vorem Hus am sünnele gsi, ha viel gläse und de Park um de Egge gnosse. Morn fangt Schuel wieder a und es heisst wieder "vamos apprender español".

3 March 2017

Am nächste Tag isches mit de Gondle uf de Zuckerberg wo eus wieder e fantastischi Ussicht erwarted het. Für mich isches zwar scho zweitemal gsi aber au dassmal isches es super Erlebnis gsi. Zmittag hemmer eis den innere 5 Stern Rooftopbar mit Ussicht uf de Ipanema Strand gönnt. Nacher hemmer selber nochli Sand under de Füess welle spühre und hend de restlich Namittag am Strand verbracht. Es het en wunderschöne Sunneuntergang ghe und dezue 1,2,3, Caipis😂. Zletscht simmer no di bekannt farbig Stäge go ahluege.
Am Dienstag simmer als ersts grad zum "Cristo" ufe und hend super Wetter gha. Nachdem mir die schön Ussicht dobe gnosse hend und au die obligatorische Föteli gmacht gsi sind, isches ab a Copagabana gange. De Strand isch volle gsi mit Lüt, da hemmer eus grad de erst offiziell Caipirinha gönnt, mit richtig viel Caçacha und Zucker🍹. Mir sind den no nach Ipanema e Carnevalparade go ahluege. Am Abig hets den arabisches Esse ghe, jammmiiii😊.

27 February 2017

Am Mäntig isches am 11i am Morge nach Rio de Janero gange. Chum acho simmer mit em Taxi zmitzt in Carnevalstau cho. Mir hend eus den entschiede di letschte 10min no zfuss gha, da s'Taxi nüm vorwärts cho isch. Mir sind zmitzt durch Lapa glofe (Usgangsviertel) und hend jensti verchleideti Lüt gseh. Nachdem mir im Hotel acho sind, hemmer eus umzoge und is getümmel inegwagt. Es isch ähnlich wie Streetparade bi eus, viel verchleideti Lüt, luti Musig, gueti Stimmig und viel Caipirinha😉☀️.

26 February 2017

Hüt hemmer en Tagesusflug nach Punta del Este gmacht, ca. 1.5h vo Montevideo entfernt und für Urugayaner wie au für Argentinier en sehr beliebte Ferieort. Es isch wunderschön, het viel luxuriösi Hüser und isch alles sehr gepflegt und sicher. Uf de Klippe hets es wunderschöns Hotel/Museum im Stil vom Gaudi gha und het a Griecheland erinneret mit dene wisse Baute. En Traum.... Nachdem simmer über zwei sehr gwälti Brugge gfahre. Damit es gwüsses "Achterbahngfühl" ufchund, fahred Autos im Schuss drüber, au euse Car het Gas ghe😂. Am Strand isch den au nochli Baywatch feeling ufcho😉☀️👙.

25 February 2017

Hüt Morge isch de Wecker am 5i am Morge ab. Mir sind mit em Speed Boat am 07:15 vo Buenos Aires nach Uruguay, Montevideo gfahre. Chum acho hemmer eus grad wieder de "Touri-Bus" gschnapped und e Tour durch Montevideo gmacht. Da isch alles viel ruhiger, het weniger Verkehr und Lüt uf de Strass. Isch ebefalls sehr e herzigi Stadt, vorallem Altstadt wo bitzli a Havanne erinneret. Mir hend eus zum Zmittag e feini Meeresfrüchteplatte bstellt. Geg de spöter Namittag simmer no am Strand entlang gschländeret und sind fein italienisch go esse.
Am Fritig simmer im Viertel "Palermo Soho" ime mega herzige Kaffi en feine Wrap und für mich de best Maraguja/Mangosaft go ne. Denn simmer chli dur das Viertel gschländeret wo sooo viel herzigi Läde, Kaffis, Bars und Restaurants het. Am Abig simmer ines bekannts Argentinisches Restauran "la Cabrera" go Fleisch esse. Es isch genial gsi nur viel zviel.

24 February 2017

Am Donnstig hemmer euses "Touri-Bus" Ticket nomal brucht und sind zweite Stadion "Estadio Monumental" go ahluege. Nacher hemmer Tour no abgschlosse, sind am Fluss Rio Plata entlanggschländeret wos jensti Restaurants het und suscht de Tag no gnosse.

23 February 2017

Am Abig simmer no ine meeeeega lässigi Sky-Bar, Ussicht und Ambiente isch super gsi. Nacher simmer Italienisch go esse und hend eus nach 2 Fählversüech vo empfohlene Baars innere 3. Bar no zwei Jin-Tonics gönnt🍸.
Gester hemmer de Touri-Bus gno und hend e Fahrt is Viertel "Boca" gmacht. Es het einiges zgseh ghe, wies Fuessballstadion "Bombonera" vo de bekannte Mannschaft Boca-Juniors oder das farbige Viertel "Caminito" wos alles farbigi Hüsli und Restaurants ghe het, soooooo herzig. Aber mir sind au no i eini vo de gröschte Demonstratione inecho, euse Bus isch plötzlich zmitzt drin gsi, isch aber alles fridlich verlofe. Isch en richtig lässige Namiitag mit vielne erste Idrück gsi und schönste dra, de Sergio isch debi gsi💕.
Nach dem vielsitige Namittag hemmer eus gester Abig uf en typisch argentinische Tangoabig mit Dinner und Show gfreut. Isch super gsi und Show eifach de hammer💃🏻👍🏻.

21 February 2017

Am 3 Uhr am Namittag isches sowit gsi und ich han min Schatz endli wieder chöne id Arme schlüsse, es isch es wunderschöns Wiederseh gsi. Am Abig simmer fein go Argentinisches Fleisch esse, es isch so fein und zart gsi. Nacher simmer im Viertel "Palermo Soho" nochli umegschländeret, hend es feins Glace gno und innere Bar nochli trunke und uf euses Wiederseh agstosse.

20 February 2017

Gester isch es sowit gsi und Reis nach Buenos Aires isch losgange. Zerst bini 45min nach Bogota gfloge und den 6h nach Buenos Aires. Bi den schlussendlich am morge am halbi 6i im bett gsi. Jetzt sött den grad jede Moment de Sergio iträffe *freude herrscht❤️*.

19 February 2017

Hüt simmer mit em Bus nach Santa Fe, es chlises schöns Städtli, ca. 1.5h vo Medellin weg. Gemäss minere Homestay Muetter isch das en Ort wo die Riche ihri Finkas und Feriehüser hend. Mit em Tuctuc hemmer eus 1.5h umechauffiere la und sind au no zunere schöne Brugg. Es isch sooooo en heisse Tag gsi, het sich fast wie 40 Grad agfühlt. Hüt isch de letscht Tag mit de Thea gsi, has echt gnosse mit ihre. Morn flügi nach Buenos Aires, wo ich min Schatz triffe, freu mich riesssig druf.

18 February 2017

Wo ich nachem Parque Arvi heiglofe bin, hets im Park bi eus um de Egge ganz vieli herzigi Märtständ gha.... bi den nochli duregschländeret, ha aber nüt kauft.
Hüt simmer mit de Seilbahn in Parque Arvi, isch recht höch obe und recht chüeler gsi. Det hettmer wiedermal chöne tüüf ischnuffe ohni sgfühl zha, me het e ganzi Abgaswolche igatmet. Mir sind det obe chli go spaziere ide Natur und hend ime herzige Restaurant öpis chlises gässe und trunke.

17 February 2017

Am Fritig isch de letscht Schueltag vor mine Ferie mit em Sergio gsi. Nebed mir isch de Wolfgang en Dütsche us Köln, mit ihm hani 3 Wuche Schuel verbracht. Die andere zwei sind us England. Am Abig isch im Parque Ileras nomal voll Post ab, super Musig gsi und gueti Stimmig.

16 February 2017

Gester simmer nomal in botanische Garte, hend chli gfulänzt und Ufzgi gmacht. Isch en relaxte Namittag gsi....

15 February 2017

Am Mittwoch hani mit de Thea nach de Schuel no e Touri-Bus tour gmacht. Viel neus hets allerdings nöd zgseh ghä, mir hend all wichtige Plätz bereits gseh. In Medellin gits praktisch kei historischi Gebäude, da die alte schöne Gebäude dur neui Ersetzt worde sind. Aber de Bus isch sooooo bequem gsi, Thea isch bereits nach 5min igschlafe 😂😂 (wie mer ufem 1. Foti gseht) und au ich bi paar mal idöset.

14 February 2017

Au bi eus ide Schuel hends de Valentinstag gfiered, Kolumbianer kenned de aber suscht nöd so wie mir en kenned. Direkt nach de Schuel hets no es Früchtetesting ghe, vo allne typische kolumbianische Frücht. Nacher hani mir richtig feini Pestopasta gönnt und im Park chli "chilled". Sushi hets den no zum Znacht ghe. Leider isches mir a dem Abig total schlecht worde und ha nachem Indercambio hei müsse. Mit em Chopfweh und Übelkeit hani no lang zkämpfe gha, zum Glück het den Reiseapothek ghulfe.

11 February 2017

Nach 2 Stund Bussfahrt vo Medellin nach Guatape hemmer eus a die 750 Stägetritt vom ca. 200m höche "Peñon" anegwagt. De Ufstieg isch streng gsi, aber es het sich soooooooooowas vo glohnt. Ussicht isch einzigartig und traumhaft gsi...
Nachem Ufstieg simmer is Städtli Guatapé glofe. Es isch es uh herzigs, farbigs, chlises Städtli. Am Abig hemmer Nachos als Vorspiess welle ne, Portion isch so gross gsi hend nacher kei Hauptspiess meh möge😁. Nacher isches nochli in Usgang gange, hend tanzed, kolumbianisches Bier trunke und viel lute Latinsound glost.

10 February 2017

Hüt nach de Schuel bini fürs Paraglide abgholt worde. Mir sind mit em Auto bis uf 2'500 Meter gfahre, uhhh wit obe. Mir isches grad chli mulmig worde wo ich die Höchi gseh han. Am Afang isch no alles guet gsi, doch mir isches nah dis nah immer chli komischer worde ide Luft. Bi nöch dra gsi mich z'überghe. Nach de Landig hani no recht lang brucht bis es mir einigermasse wieder bessser gange isch. De Instruktor het gseit das passiert immer wieder und seg normal. Paragliding hani jetzt 1x gmacht und isch somit abghagt✅🤢😁.

9 February 2017

Nach de Schuel bini i min lieblings Wrap-Lade en frische Wrap go hole.... den hani en feine Mocca-Icecoffe trunke und i eusem Schuelcafée, mini witeri Reis plant. Am Abig hemmer vo de Schuel us no zwei Stund Intercambio gha, dass isch en Ustusch mit Kolumbianer wo wend englisch lerne und vo Lüt wie ich wo wend spanisch lerne. Jede cha vonenand profitiere,isch cool gsi. Mir hend mit zwei junge Kolumbianerinne gredet. Am Abig het mir Blanca (mini Gastmuetter), no sganze Viertel wo mir wohned zeiged. Het en super coole Park mit viel Graffitis und viel "Fresständ". Das Viertel wo ich wohne heisst Ciudad del Rio und gits erst sit 8 Jahr, daher isch alles recht neu.

7 February 2017

Gester hemmer nach de Schuel e City Tour dur Stadt gmacht. Ha zwar scho viel mit em Erwin gseh, aber isch sehr spannend gsi was de Tour-Guide alles verzellt het. Medellin isch vor ca. 20 Jahr die gföhrlichsti Stadt vo de Welt gsi, mittlerwiele het sich das alles gleit und Stadt wird immer hüfiger vo Touriste bsuecht. Medellin isch ime riese Wandel und zwar zum Guete. Uf eim Bild gseht mer e zerstörti Vogelskulptur und uf em andere e neui. Die zerstört söll anen Bombeaschlag vor ca. 10 Jahr erinnere. Euse Guide het verzellt, dass um di wiss Kirche sich jensti Prostituierti versammled, um e anderi Kirche werded gfälschti Sache aber au Pornos verchauft. Das passt ja eigentlich gar nöd zu de Kirche oder id Nöchi vo de Kirche, aber Kolumbianer bitted um vergäbig und hend sgfühl si hend wieder e wissi Weste. De Trip isch sehr spannend gsi.

5 February 2017

Am Sonntignamittag simmer mit em Tram zur neuste Seilbahn in Medellin gfahre, wo erst im November 2016 ufgange isch. D'Sicht uf di eifache Hüüsli wie au s'Wetter isch super gsi. Es isch sooooooo heiss gsi, dass mer dobe ime chline Lädeli es erfrischends "Cerveza" trunke hend.

4 February 2017

Am Samstig Abig isches is Usgangsviertel "Parque Ileras" gange. Zerst hemmer dusse öpis trunke den isches in en Club gange. Stimmig isch super gsi, hend viel tanzed und Aguardiente trunke. Das isch en einheimische, kolumbianische "Schnaps" wo als Shot mit Wasser trunke wird. Sehr starch...
Nachher isches mit em Taxi in Botanische Garte gange. Nachere verdiente Mahlzit simmer im Garte nochli go spaziere....
Hüt Namittag simmer 3te uf en chline Hügel zmitzt ide Stadt gange, wo mer e super Ussicht uf Medellin het.

3 February 2017

Am Abig isches den no in Usgang gange, ane lebendigi Strass mit jenste Bars und Clubs. Stimmig isch einzigartig gsi, überall isch Latinosound glofe und lüt hend tanzed und glached. Richtigs südamerikanisches feeling isch ufcho, eifach super gsi.
Nach de Schuel hets zerst es kolumbianisches Mittagesse ghe. Nacher isches mit de Schuelgruppe zum "Estadio Atanasio Girardot" gange wo mir e Privatfüehrig durs Fuessballstadion übercho hend. Mir hend au di ganze Duschene und Ufhaltsrüm vo de Mannschafte gseh.

2 February 2017

Die Graffitis sind eifach wunderschön...., me gusta...😍
No witeri Graffitis...
Zum Schluss het jede no sälber öpis ufe Wand spraye... Es isch en super Tripp gsi. Leider isches mir scho bald komisch und schlecht worde. Bi aber froh, hanis durezoge. Hüt gahts früeh is Bett ide Hoffnug bi morn wieder fit. Hasta luege..
Hüt hani zäme mit Schuelkollege "Graffiti Tour" gmacht. De Ort wird mit "Comuna 13" bezeichnet, so öpis wie es Viertel mit 150'000 Bewohner. Früehner isch "Comuna 13" eis vo de schlimmste Viertel gsi, was Gwalt und Kriminalität agaht. Militär het das Viertel zimli radikal und gwaltvoll grumt. Euse Guide (de mit em chäopli) isch sälber det ufgwachse und het sogar miterlebt wie Lüt uf de Strass mit eme köpfte Chopf Fuessbal gspielt hend, "grausam😱". Mittlerwiele isch das Viertel viel sicherer und immer no im Ufbau. Jedes Graffiti verzellt e Gschicht zu früehner.

1 February 2017

Mis Zmorge, hüt recht viel und deftig...
Zum Schluss no es Foti vom mim Viertel " Barrio Poblado".
De Platz "Plazo Botero" isch für sini dicke Skulpture bekannt wo vom Künstler Fernando Botero gmacht worde sind. Kathedrale hine dra isch wunderschön. Polizei isch überall sehr present, ob usserhalb oder zmitzt ide Stadt.
D'Innestadt isch volle vo Lüt, jenste Shoppingläde, Früchtehändler aber au mit vielne Prostituierte. Me merkt en rechte Unterschied vo dem Viertel wo ich wohne (bessers Viertel) und vo de Innestadt. Es isch es riese Shoppingparadies, es het soooooooooo viel Läde, me weiss gar nöd wo ane luege.
Nach de Schuel simmer mit de Metro id Stadt gfahre. Kolumbianer sind uf ihri Metro sehr stolz...

31 January 2017

Am Abig bini mit em Erwin, en Schwitzer us de Schuel, no eis go zieh im Usgangsviertel "Parque Ileras". Det hets ei Bar nach de andere, eini isch bsunders schön im Grüene under de Bäum gsi....
De zweiti Tag ide Schuel... nachere witere neue Zitform im Spanisch, hemmer gratis Salsa Lektione gno 💃🏻 und hend eus nachher es kolumbianisches 🍻 gönnt.

30 January 2017

Min erste Schueltag.... 4h ide Gruppe und zwei Stund Privatlektione. Ich bin kaoooooo

29 January 2017

Die erste Idrück vo Medellin. Mini Gastmuetter Blanca het mir hüt de Weg id Schuel zeigt (ca. 20 min zFuess), wie mer Bus fahrt, was e rechti Herusforderig wird, da mer kei Ahnig het welle Bus wo ane fahrt und wo er halted🙈. Es het au überall cooli Graffitis. Was ich bis jetzt vo dere Stadt gseh han, gfallt mir sehr..... mal luege wie min erste Schueltag morn wird. E kolumbianischi Natel Nr. hani jetzt au: +57 322 648 99 45.
Mini erst Nacht isch dure und wenni usem Fänster im 13. Stock luege gsehts nach blauem Himmel us👌🏻☀️

28 January 2017

Ich bin endlich acho am 17:30 Kolumbiezit. Bin gspannt was mich erwarted.