Peru, Colombia, Ecuador · 72 Days · 30 Moments · December 2017

Daniel's Tour durch Peru


15 February 2018

Hey Folks! Phuuuu es git vieeles nahzhole, aber nachdem min Journi-Biitrag 3x eifach verschwunde isch wüls d Föteli nöd hett chönne uelade hetts mer abglöscht. 😁 Drum da d Churzfassig ohni Fotis: Nach Quito simer z füfte uf Cotopaxi und dett uf 4800 Meter uf en Vulkan uegloffe. 2 Täg später bini mitere grosse Gruppe us de halbe Welt wiiter uf Baños, emne chline Ort mit ganz vill Action. So simmer z.B. Wasserfäll durab go chlettere und ich bin go Bridgejumping mache. Nacher isch en Grossteil vo dere Gruppe wiiter uf Montañita wo 3 Täg Karneval gfiiret worde isch - e Rieeeseparty mit mega vill Lüüt, ganz vill Schuumspray und Strandfescht. Da simmer ez no, vill sind scho wiiter und ich bin miteme Ami da blibe, wo sech dummerwiis e Infektion ide Auge ihgfange hett. Ez hani no e Wuche bis min Flug vo Quito gaht und überlege, entweder morn no für paar Täg uf Cuenco im Süde z gah oder scho langsam richtig Quito uezreise. Und denn gahts scho wider hei. 😭 Aber freu mi au uf paar Sache dehei!

30 January 2018

So, nach mim gestrige nächtliche Abentüür wo einigi vo eu ja scho mitübercho hend, bini hüt guet ufgstande und mit strahlendem Sunneschii begrüesst worde - nüt vo 15 Grad und Räge! Bin denn wie immer weni inere neue Stadt ahchume z Fuess chli go erkunde. Quito gfallt mer sehr oder emel das woni bis ez gseh han. Uf de Plaza Grande hani en Dütsche und en Schwiizer troffe wo gschäftlich unterwegs sind und die hend mer gseit ich söll s berüehmte Seilbähnli lieber ganz früeh am Morge neh denn hegs no nöd so vill Lüüt. Drum hani denn entschide zu dem Engel mi de lüüchtende Flügel (hani guet pfötelet gelled?! :P) z laufe. Chli is Schnuufe cho aber mitere super Ussicht belohnt worde! Denn bini an Mercado und han mer Apéro-Sache kauft woni ez uf de riesige Dachterrasse gnüsse. Ah und wie gfallt eu min neue 6-Dollar-Haarschnitt? 😄😄

27 January 2018

Zum Coiffeur/Barbier sötti glaub au mal no bevori wider muss go schaffe! ✂️😜😂
...würklech nomal i volle Züg gnosse! Ahja und s Chätzli isch, nachdem ich zwei Würstli mitem teilt han, min ständige Begleiter gsi. 😄 Hett bi mir ide Hängematte pfuuset, ich has geg streunendi Hünd verteidiget, mir hend zeme mitere leere Petfläsche „Fuessball“ gspillt etc., schnüsiiiiig! 😍 Ez hani aber gnueg gfuulenzt und flüg drum übermorn, au wenns nöd ganz billig isch, uf Quito. Andi, Arlette: Tipps für Hostels, Usflüg, Restis etc. in und um Quito sind sehr willkomme! Freu mi sehr no es anders Land z gseh und wett au würkli nomal chli öppis unterneh nachdemi ez doch eher gemächlich unterwegs gsi bin da ade Küste. 😊 Und vorussichtlich (muess morn nomal all Ahgebot gnau checke, isch recht müehsam mit Skyscanner und Co.) flügi am 22.2. ab Quito zrugg uf Züri, denn hani no es Weekend und paar Täg zum mich wider ihlebe. 😊 Das teili aber denn no gnau mit. Im Moment bini wider z Cartagena, die Stadt hanget mer aber chli zum Hals us. Blöd, spillt de Fedi ersch am 03:30 Ortsziit. 😜
Okay, vill meh Karibik-Kitsch gaht glaub nüme! Traumhafti Sunneuf- und Untergäng, hellblaus Meer, wiise Sandstrand, ide Hängematte oder eifach im Sand schlafe, barfuess im Sand tanze, zum Ruusche vom Meer ihschlafe und ufwache; i einere Nacht meh Sternschnuppe gseh, als ich glaub bisher i mim Läbe Wünsch gha han, nach tonnewiis Büchsethunfisch sech mal e trucha gönne, hin und wider en Mojito schlürfe - eifach wunderschön gsi! 😍 Lustigerwiis hetts uf dere Insle sozege nur Argentinier gha. Die sind chli wie d Italiener, i grosse Gruppe unterwegs, luut, ihvernehmend, chaotisch und mengisch chli nervig. 😅 Aber wenn d Tagestouris amigs mal weg gsi sind isches echt en Traum gsi. Und die eint oder ader Gruppe vo sympa Argentinierinne hani denn doch au troffe - nach zwei Äbig muesi ufpasse dassi nöd au us jedem „y“ es „sch“ mach und somit useme „yo ya estoy a la playa“ es „schoschastoyplascha“ oder so ähnlich. 😂 Han die Ziit und au d Internetlosigkeit wo grössteteils gherrscht hett...

23 January 2018

Wiiters Mini-Update 😍😍😍

17 January 2018

Mini-Update: Han Santa Marta verlah und nomal paar Täg z Cartagena verbracht, ez machi mi voll bepackt mit Esse und Wasser uf in Richtig enere eher abgschidene Insle woni wohl paar Täg kei Internet han. Bin aber also purlimunter! 😄

14 January 2018

Am Sunntig hends mich denn au grad no mit uf ihre Family-Usflug gno und mir sind zumne Ort gloffe wos mehreri so abgstufti Wasserfäll hett inere alles in allem ca. 80 Meter höche Felswand ine. Han natürli mitem Max zoberscht ufe müesse chlättere wüls dett mit 19m s tüüfschte vo de verschidene Wasserbecki gha hett. Meh hett au vode Felse abegumpe chönne - irsinnig schön gsi! Z Palomino selber hetts en kilometerlange mit Palme gsäumte Strand und me cha sech imne Reife de Fluss durab triibe lah wasi natürli au han müesse mache - chunnt aber bi Wiitem nöd ad Aare here! 😉 eher verglichbar mit de Linth! Ez bini sit zwei Täg wider in Santa Marta, gester hett no de Hostelbsitzer Geburi gha drum hemmer da es Bbq gmacht und ich und zwei anderi sind em no e Torte go chaufe. 😄 Bin ez no bis morn da, denn gahni vorussichtlich uf Barranquilla - und denn wetti mal luege öbi die Segeltour uf Panama chan organisiere und was die so würd koschte...

13 January 2018

...und denn au endlich dett ahcho wo au luut Google Maps s Hostal Rl Mirador sött sii - aber wiit und breit nüt anders als Sand ahtroffe. 😂 denn hani mi dur de Wald wider zude Strass gschlage und beschlosse ich gang irgendwie is Center und suech W-Lan zum dene vom Hostel z schribe. Bin denn vomne Chico mit sim Roller wider is Zentrum gfahre und dett wenig später abgholt worde. 😅 S Hostal selber isch denn es chlises Paradies gsi! (Und effektiv öppe 50 Meter vom Punkt woni losgloffe bin entfernt. 😂) isch e Familie wo das Land vor knapp emne Jahr kauft hett, slso zwei Schwöschtere ihri Männer und de 12-jährig Sohn Max vom einte Paar. De hett natürli Freud gha dass ich cho bin und ich han stundelang „müesse“ mit ihm tschutte, welleriite, Wettrenne mache etc. 😅 Die hend sich uh lieb um mich als ihre einzig Gast kümmeret und für mich kochet und alles und am Abig simmer oft no chli zemeghocket bimne Glas Wii und hend plauderet. Mega entspannend gsi!

12 January 2018

Phuu, wo afange? Also zersch mal d Ahreis uf Palomino: De Bus hett mich dett herebracht und eigentlich hett mich d Frau vom Hostel-Bsitzer welle cho abhole. Das hett denn aber nöd klappet, wül de Busfahrer versifft hett, mich am richtige Ort usezlah. Also bini zersch is Zentrum gfahre worde und denn vomne andere Bus die ca. 10km wider us em Städtli use, wo aber niemer meh uf mich gwartet hett. Han denkt easy de Bsitzer hett gseit es seg ganz ide Nächi und uf Google Maps gsehni au was also laufi mal los. Denn bini zersch ca. eis Stund de Strass nah gloffe und han es Tor gseg - s erscht Mal denkt ich hegs gfunde; nüt isch gsi die hend mer gruefe seg privat und uf mini Frag gantwortet ich müssi da dur de Wald an Strand abe dett segs. Also ab an Strand, Schueh uszieh und dett wiiterlaufe. Nach 30‘ i die eint Richtig s zwei Mal gmeint ich hegs gfunde - nüt isch gsi, aber i die ander Richtig alles am Strand nah hegs es Hostel. Also nomal guet 40‘ i die ander Richtig gstapft...

8 January 2018

Ich bin mittlerwiile 3 Täg in Santa Marta gsi, sehr schön da! Und dasmal hett sech au d Bootstour glohnt, bin mitem Bsitzer vom Hostel und emne Mitarbeiter zersch mitem Bus uf Taranga gfahre und dett ines Boot gstige. Das hett denn all andere Touris ade Playa Grande uselah und hett üs no um e wiiteri Landzunge gfahre und dehinder isch es chlises Strändli gsi, ca. 10 Meter mit einere Bar und fasch kei Lüüt - ide Hochsaison sehr schwirig so öppis z gfinde! Sind denn no go schnorchle und debii hani mer d Füess chli uftätscht ade Klippe, aber nöd wiiter schlimm und bin vomne dütsche Chrankepfleger fachmännisch verarztet worde. 😄 Ez gahni mit zwei Dütsche no chli wiiter in Norde uf Palomino, es chlises Fischerdörfli wo au sehr schön muess sii - no chli meh Karibik bevori mer denn überlege muess wies wiitergaht! 😉

6 January 2018

Schnellboot-Tour ufd Isla Rosarios und ad Playa Blanca und wider zrugg uf Cartagena. Inklusive Schnorchle und es eher enttüschends Unterwasser-Museum. Und de Strand isch heillos überfüllt gsi 🙈 aber immerhin d Bootsfahrt hett mega Spass gmacht! 😄 Hüt Abig gahts wiiter uf Santa Marta und vo dett us denn inen Nationalpark woni hoffe, Stränd mit biiiz weniger Lüüt z finde. 😄

5 January 2018

Ahja, Cartagena isch sehr schön, wenn au völlig mit Touris überlade. Einzig ade Strasseentwässerig müends no chli schaffe, letzt Nacht hetts gregnet und hüt isch drum eifach mal en Teil vode (Haupt-!)Strasse chnütüüf unter Wasser gstande. 😂😂

1 January 2018

Siilvester in Medellín isch suuuper gsi, mit emne Israeli, enere Holländerin und emne Ihheimische. Hend so lang gfiiret dassi de Darts-WM-Final am nächschte Tag am 3 grad direkt han chönne ines Pub go luege. 😁🎉 Denn bini go pfuuse und am nächschte Tag hemmer uf de Dachterrasse vom Hostel no es BBQ gmacht, bevors für mich am Tag druf mitem Flugi über Bogota uf Cartagena gange isch. Findi mega ihdrücklich die Starts bi Nacht inere Grossstadt, das Liechtermeer! 😍 In Cartagena bini denn am 10i am Abig usem Flugi gstige und han zersch gmeint es seg vode Triebwerch so warm oder so, isch aber nüm chüehler worde: am Tag isches da so geg die 31 Grad, ide Nacht 25 😍😍 bin schnell is Hostel de Rucksack go ablade und denn ane Plaza, wos kei 5‘ gange isch und ich bin vomne Venezuelianer (?) ahgsproche worde. Han denn d Nacht mit ihm und paar vo sine Fründe verbracht, all arbeits- und obdachlos. Spannend gsi, aber au chli trurig. Die letschte zwei Täg hanis mer ez da eifach chli guet gah lah.

30 December 2017

Am zweite Tag hend mer e knapp 6-stündigi Wanderig gmacht zude bis zu 70 Meter höche Wachspalme und wider dur en sehr schöne Regewald inklusive Hängebrücke und allem was dezue ghört. 😎 geg de Schluss hetts denn wider (wie leider immer ide letschte Täg) richtig afange abelääre, drum isch üse Weg denn au eher en schlammige Fluss gsi als en Weg. 😅 am Abig hemmer e Beize-Tour gmacht und sind go Tejo spile, es Spiel womer mit grosse Stei uf mit Schwarzpulver gfüllti Briefli wirft und die so zum Explodiere bringt - in Kombination mit paar Bierli es seeehr lustigs Unterfange! 😂 Hüt bini mitem Bus 7h uf Medellín gfahre, woni vor churzem ahcho bin. Ez gahni mal no öppis go esse, morn chli d Stadt go ahluege und am Abig luegi mal öbi öpper finde wo mit mir Silvester fiiret. 😉 Bilder werded denn evtl mal nahgliferet, so das W-Lan will!
Sooodala ich hoffe da isch s W-Lan stabil gnueg zum mal wider en Biitrag uezlade. 😅 (Nachtrag: Bilder uelade funzt au da nöd 😂) nach Bogotá han ich e Nacht in Pereira verbracht, hett mer aber nöd würlklich gfalle, drum bini denn am nächschte Tag mitem Bus wiiter uf Salento. Das isch es meeega herzigs chlises Dörfli im Herz vom Kafi-Ahbaugebiet und im ebefalls meeega herzige Hostel bin ich denn au grad super begrüesst und willkomme gheisse worde vonere Gruppe Israelis, emne Dütsche, paar Franzose, zwei Ukrainer und eim us Alaska wo bezeichnenderwiis inere Fischverarbeitigsfabrik schaffet. 😂 Am erschte Tag hani nöd de Huufe gmacht, chli s Städtli ahgluegt und e feini Trucha al Ajilo gesse und am Abig chli mit de Lüüt plauderet und Charte gspillt...

24 December 2017

Phuuuuu Bogotá, was füre Mega-City! Am Tag luut, dreckig, stinkend und unglaublich chaotisch! Ide Wiehnachtsnacht defür wie usgstorbe, da fiired d Kolumbianer würklech all mit de Family! Hend denn aber glich es paar Locals troffe und die hend so Freud a üs Gringos gha dass mer 100000 Föteli mit ihne hend müesse mache. 😂 Hett guet tah, mal 2 Nächt imene richtige Bett z schlafe, ez sitzi grad mitem Dave bim letschte Bier und denn gahts für ihn hei und für mich uf Pereira und vo dett us morn wiiter uf Salento. Dett chame schiinbar sehr schöni Wanderige mache, bliib glaub paar Täg dett. :) und denn plani wiiter, Fernziel Silvester in Medellin!

21 December 2017

Nach üsere letschte Nacht in Cusco - wo natürlich usgibig hett müesse gfiiret werde 😜 - und enere eher ahstrengende Reis inklusive 9h warte am Flughafe Lima sowie es paar bürokratische Detail-Striitigkeite (die gueti Dame am Schalter in Peru hett mich zersch partout nöd uf de Flüger welle lah wül ich nöd han chönne vorwiise, wenn und wie ich Kolumbie wider wird verlah ((das chan doch dere Schnepfe z Peru glich sii!)), hett am Schluss aber glich alles klappet und han 90 Täg Visum becho, dene z Kolumbie isches nämli so lang wie breit gsi 😂), sind mir ez grad i üsem Hotel in Bogotá ahcho. Und jaaaa, Hotel! Gönned üs für die nächschte zwei Nächt es richtigs Hotel mit Kingsize-Bett und Pool ufem Dach. 😍 ez isch da Wiehnachte ahgseit und am 25igste am Abig flügt de Dave zrugg uf Wien und ich lueg wiiter - vermuetli gahts denn gen Norde. :) Eu allne ganz es schöns Fescht! 😘

18 December 2017

Lang hend üsi Bei aber nöd chönne usruehe, am nächschte Tag isches die 4h wider zrugg gange uf Hidroelectrica und vo dett mitem Bus 6h uf Cusco zrugg. Am nächschte Tag sind de Dave und ich no d Salineras vo Maras go ahluege und hend e Tour ufs Rainbow Mountains buecht. Die sind uf 5200 Meter obe (wider chli stolz uf mini Raucherlunge! 💪) - und ehrlich gseit nöd halb so ihdrücklich gsi, wies uf Bilder usgsehnd (vgl. Bilder anbei). Ez blibe mer no bis am Samstig in Cusco und denn hani entschide mitem Dave uf Bogotá z flüge und dett zeme Wiehnachte z fiire. Das isch zwar nöd so ganz min ursprüngliche Plan gsi, aber mengisch muess mer flexibel sii! 😁

17 December 2017

...nach 1664 Stufe dur de mystischi Urwald eeendlich s magische Machu Pichu z erreiche! 😍😍 Mir hend üs Ziit chönne lah wül mer eh no e Nacht in Aguas Caliente verbracht hend. Deum hend de Dave und ich üs denn nomal gfühli 4729193 Stufe uf de Machu Pichu Mountain geh. Mir wäred zwar fasch verreckt aber es hett sech sowas vo glohnt! Natürli isches nacher au alles wider durab gange, womit mer zimmli gnau 10h unterwegs gsi sind. Mini Bei sind gstooorbe! 😱😱😱

16 December 2017

Tag 3 hett denn no us Ziplining und wiitere 4h wandere bestande. Jetzt hett au de Regewald sim Name s erscht Mal alli Ehr gmacht und es hett gschüttet wie us Chüble. Am spätere Namittag sind mer denn mües aber happy in Agua Caliente ahcho und no öppis gesse, bevor all früeh go schlafe sind, wül mer am nächschte Tag am 4i use hend müesse zuuuuum... *Trommelwirbel*

15 December 2017

Au am nächschte Tag hemmer früeh use müesse und es hett gheisse laufe, laufe, laufe. Insgesamt 9 Stund simmer mit üsem Gepäck dur de Regewald gloffe, oft au ste ufe und teilwiis ufem originale Inka-Pfad vo früehner. Dezwüsche hemmer no Kafi gröstet, verschideni Tequillas chönne probiere und natürli immer wider Kokablätter kaut fürd Energie. Am Abig hend mer üs denn mitemne Bad i natürliche heisse Quelle und emne chline Feschtli für üsi Leistig belohnt. :)

14 December 2017

So, ez wirds ersch richtig spannend: am nächschte Tag simmer am 06.30 abgholt worde und mitem Bus uf 4300müm gfahre worde. Dett hend mer Usrüstig und Bikes gschnappt und sind i ca. 2h meh als 2000 Höhemeter e Passstrass durabblochet (wär was für dich gsi Timo! 😄) nachem Zmittag sind mer denn no 2h go River rafte - ultra ahstrengend, wül de Dave und ich die einzige zwei Männer uf üsem Boot gsi sind und vorne hend müesse paddle wie die Wahnsinnige, aber meeega cool! Würdi gern nomal mache i dene Ferie!

12 December 2017

De Herr wo mir ufd Schultere klopft hett isch de David Valasek gsi, en Tschech wo in Wien lebt und woni in Lima kenneglernt han (Föteli 8, de Herr mit dw fascht-Glatze). Er isch a dem Tag in Cusco ahcho und per Zuefall ide gliche Bar gsi. 😄 Das Widersehe hend mer natürlich müesse fiire, was sech die ganz Nacht durezoge hett. Am Morge isch er go schlafe und ich bin mit de andere lustige Herre uf de Föteli ufen Hügel go Fuessball spile - wer gwunne hett isch glaub unschwer erkennbar. 😂 s zweite Föteli isch Cusco im Morgengrauen. Am Abig hend de Dave und ich denn no e Tour buecht für de nächschti Tag. (Cliffhanger! 👆)
Holaaaa Freunde und Familie. So, es git wider vill z verzelle! Nachdem ich am Mentig die erschti Tour in Cusco gmacht han, hani mi entschide, am Zistig nomal anere gfüehrte Tour teilzneh. Dett hend mer d Kathedrale vo Cusco, 4 verschideni Inka-Stätte und no paar anderi Sache ahgluegt. Zrugg im Hostel hani zwei Französinne kenneglernt und lang mit dene plauderet (somit hetti ez all Sprache woni einigermasse beherrsche verwendet! 💪😜). So hani au erfahre, dass e Bootstour vo Izquito nach Kolumbie definitiv möglich und sicher spannend wär. Denn hani denkt ich gah no schnell ufes Bier is Städtli und es isch kei 5‘ gange und öpper chlopft mer ufd Schultere. Wer erfahred er im nächschte Post, wüli nur 10 Bilder und e begrenzti Ahzahl Zeiche han pro Moment. (Merked er wienich gschickt Cliffhangers ihbaue?! Ez müend ers nurno ide richtige Reihefolg läse! 😂)

11 December 2017

Was für en Tag wider! Nachdemi die chalt Duschi überlebt han isches kei füf Minute gange bis ich mich andere Tour mit emne local guide ahgschlosse han mit Lüüt us ca. 10 verschidene Natione. De hett üs 2h z Fuess dur Cusco gfüehrt, em Herz vom damalige Inka-Riich. (Luut Archäologe isch das goldige Symbol genau s Zentrum vo dem Riich gsi.) hend mega vill spannends Züg ghört und glernt über die Stadt und de Glaube vode Quechua („Inkas“ hend sech eigentli nur d Herrscher gnennt, s Volk sind d Quechuas gsi). Begleitet worde simmer vo zwei Strasseköter namens „Pisco“ und „Sour“. 😂 Gendet hett Tour denn au miteme Pisco Sour und enere Vorfüehrig wie mer Ceviche zuebereitet - han natürli gad wider eis müesse esse. 🙈 Chli später hett mi en lokale Maler ahgsproche und ich bin mit ihm ine „Chicheria“. Chicha isch sones liecht süürlichs Maisbier, dezue gits immer scharf gwürzts Quinoa o.Ä. demit me meh Chichas trinkt. 😄 has denn natürli am Schluss nöd chöne lah, ihm au 3 Bilder abzchaufe. 😄

9 December 2017

Brrrrr! Erschti Mini-„Challenge“ für de Warmduscher #1: In Cusco bi Temperature vo <10 Grad chalt dusche. ☃️❄️ da isch also s Meer in Lima grad warm gsi degege! Das ufem Bild isch de David, en Tschech wo in Wien wohnt und woni no in Lima troffe han, superlustig gsi! 😄 De Transfer nach Cusco isch denn problemlos verloffe, bin gester Abig ahcho und bald mal go pfuuse. Und ez nachem zmörgele machi mi uf die Stadt z erkunde. :) eu au allne en guete Wuchestart!

8 December 2017

Ich schon wieder! Hüt bini mal inen ganz andere Stadtteil vo Lima, id Altstadt wo au d Plaza de Armas isch. Hett mer aber gar nöd gfalle, überall isch s Militär umegstande und hett - ganz em Name entsprechend - mit Bazookas umezielt, me hett sech chönne als Militärmensch verchleide und Fotis mach etc. - gar nöd mini Welt! Drum bini denn mitem Bus wider ad Küste gfahre, dett chli dur es riese Ihchaufscenter gschlenderet (au nöd mini Welt!), han imne chline Beizli mis deitte und bislang beschte Ceviche gesse (ich chume de rohi Fisch scho no gern über! 💪) und chli de Surfer zuegluegt. Hüt gahni ez nomal eis go zieh und chli go fiire, morn mal luege und am Sunntig gahts denn witer uf Cusco, Flug und Hostel sind buechet. 😄 Damit bis auf Weiteres ganz vill Liebi und e schöni Adventsziit wiiterhin! ❤️

6 December 2017

Wie plant bini am Mittwuch uf de Markt und denn Barranco chli gnäuer go inspiziere - würklech en wunderschöne Stadtteil! D Hiireis dett here hani mitem Bus gmeischteret, bin also scho voll de Local! 💪😜 Am Abig bini denn mitere Peruanerin go znacht esse nachdem mer im Hostel chli gitärrelet und gliedet hend. 😄 nachem Esse sind mer denn no chli s Nachtlebe go erkunde, drum bini gester recht müed gsi und han nöd vill gmacht. :) am Sunntig flügi wiiter uf Cusco und mache dett de Machu Pichu. Und denn muesi mer scho bald überlegge woni Wiehnachte verbring. 😄 saludos y abrazos a todos! ❤️

5 December 2017

Sooo Freunde, nachdem mich Journi scho stresst, mich mitzteile, isch min erschte Blog-Ihtrag fällig. (Und ihr kenned mich, ich han Müeh, mich churz z fasse. 😁) Ich bin super ahcho hüt Morge und han min Rucksack im Hostel abgliferet. Denn bini zersch mal chli ide verschidene Parks und ide Stadt go umelaufe, han mis Buech fertig gläse und bin denn go ihchecke. Im Hostel hani de Sven und d Lilli kenneglernt, vom Sven ghöred der denn evtl. i 4-5 Wuche nomal. 😄 denn bini de Mauricio Muente go bsueche (de Name! 😍), bi dem hett de Marco während sim Uslandsemester gwohnt. Nachem CL-Match bini mit ihm und sim Kolleg, em Santiago, uf Barranco gfahre, so chli s Hipster-Viertel vo Lima - muesi morn unbedingt no gnäuer go erkunde! 😍 zrugg im Hostel hemmer all zeme kochet und no en Pisco trunke und ez liggi müed aber meeeegahappy im Bett.😊 morn denn am Morge an Markt, denn wie gseit nomal uf Barranco und denn luegi wiiter. :) bis baaaald! 😘