Europe, North America · 23 Days · 50 Moments · March 2017

New York - Toronto - Miami/Florida 2017


8 April 2017

Guet in ZH acho.
Soseli. Nach 3 Wuche sind eusi Ferie verbi. 😥 Mir packed grad no die letschte Sache und fahred denn an Flughafe. Das Journi het min Ehrgiiz packt, jede Tag es klises Tagebuech zfüere. Als ersts für eus sälber, dass mir nüt vergässed und eus immer weder chönd dra erinnere und zwoitens, dass eusi Familie und Fründe wos interessiert immer kli mitreise chönd. Ich glaub ich has ganz guet anebrocht. (Es händ ämel grad es paar reklamiert, wenn's mol en Tag lang kei Itrag geh het 😄😄) Es het uf all fäll spass gmacht. Ufe klini Rückmäldig würd ich mich freue. Da's ja jetzt weder warm werd ir Schwiz, beginnt au d'Wohnmobil-Saison weder. Ich nimm mir vor, au uf dene Reisli immer en Journi z'mache. Falls der au die wänd mitverfolge, müender nid nur dem Journi, sondern au mir oder der Eli sälber folge. So, danke euch und uf wiederläse 😋😊😊

6 April 2017

Miami Mittelgrossi, mittelschöni Stadt. Mir si erst am spötere Nommi acho, händ kli länger es Hotel gsuecht und in Miami Beach gfunde. S'schönste bis jetzt uf euserer Reis. Hüt nütze mir de ganz Tag de Touri-Bus und lönd eus umefahre. Morn am morge gohts an Flughafe heizue. Mir freued eus uf deheim😊

5 April 2017

Es het ändlich klappt mitem Schorchle. Wow. Fantastisch gsi. Miteme Boot und witere 50 Bsuecher simmer 45min is Meer usegfahre. Mit Schwimmweste, Schuumstoffnudle, Brülle, Flosse und Schnolchel, simmer is erfrüschende Wasser gümplet. 2 Schnorchler händs aber gar nid vertreit und händ im Wasser e chlini Panikattake gha. Sie sind denn Schnäll und professionell grettet worde. Mir hei i dene Riff wo zum Teil nur es paar cm tief gsi sind e huufe Fisch und sogar en kline Hai gseh ☺️ Zobe hei mir eus es super Ässe bimene Italiäner gönnt. No kli Mitbringel postet und scho isch de Tag weder verbi gsi. Hüt fahre mir uf Miami, wo mir die letschte 2 Täg verbringet bevors denn am Samsti morge mietere kurze Zwüschelandig in NY weder id Schwiz gaht.

4 April 2017

1.Stop isch in Key Largo gsi. Mir händ dört welle go schnorchle. Leider isches windig gsi, so dass sie kei Afänger hei welle mit ufs Boot neh. Mir hei das aber nid würklich glaubt und sgfühl gha, dass sie meiner mir chönd nid mol schwimme ode so. Naja. Sind denn witer zum "lut Reisebrichte - schönscht Strand vo Florida" Sägemers mol so. Er isch OK gsi ☺️ S'Wasser isch aber würklich Türkis und sehr warm 😍 Au dört hettme chönne Schorchle. Die hei aber die ganz Tour wägem Wind und Strömig abgseit. Somit simmer weder froh gsi, dass mir bim erste Abüter nid mit si. Nachem Bädele simmer denn diräkt uf Key West. Wow, was füres Stedtli 😍😍 wunderschön! Mir hei de Sunnenutergang agluegt, öbbis gässe und sind denn weder zrugg is Hotel. Hüt nämmer nomol en Versuech, ändlich die Koralle under Wasser zbesichtige.

3 April 2017

Sache wo mir dehei au gärn hettet: - Klima - Rächtsüberholerlaubnis - meh Platz - fründlich und ufgstellti Stimmig Hmm, eigentli nid mol so vill 🤔😄
Sache wo mir vermisse oder eifach froh sind, dass es dehei andersch isch: - Wasser ohni Chlorgschmack - Aständigi WC's inkl guetem WC Papier - Mineralwasser mit Cholesüüri überall verfüegbar - Glichmässigeri Temperature (dusse Heiss, dinne abeküelt bis zum früüre) - Bett wo nid Ultraweich und eher z'chli sind - e zweiti Bettdecki 😄 - Brot - Duschi mit Druck 😉😉
Hüt nomol en Tag ide Everglades verbrocht. Mir sind zum Nationalpark und hei dört *trommelwirbel* richtig, es Velo gmietet 😄 S'isch aber nid so speziell schön gsi de Rundkurs, so dass mir denn au gli weder gange sind. Eifach idrücklich, dass Aligatore eifach so am Velowägrand ligged, nur paar cm vo allne lüt entfernt. Ide Schwiz undenkbar 😉 Euse Wäg het eus när Richtig Key West brocht, wo mir in Key Largo es super cools Hotelhüttli gfunde hei. Morn gömmer go Schnorchle und fahre denn die Küstestross witer richtig Weste.

2 April 2017

Was füren Tag. Fantastisch! Am morge grad id Everglades und 2 Speed-Boot-Toure buechet. 1 Stund dur die atemberaubeni Landschaft mit all dene Bäum wo im Wasser stönd düset. Denoch no e 30min Tour dur Graslandschaft. Am Nomi denn no e ruhigeri Fahrt i die 10'000 Insle wo sogar Defline mit eus mitgschwumme sind. Es Motel hämmer aschliessend in Homestead gfunde. No schnäll zum Italiäner go fein ässe und de morgig Tag planet. Das het gfägt und mir sind weder mol richtig uf de Stümpe 😊😊

1 April 2017

Gmüetliche Tag i eusem Strandhüüsli. S'Wätter isch weder sehr heiss worde und mir hei de Tag miteme Velotürli duren Park verbracht. Aligatore, Chräbsli und Schildchröt sind eus übere Wäg gloffe. Zobe no kli ins Meer und de Tag miteme sälberkochtem z'Nacht usklinge loh. Morn gohts id Everglades.

31 March 2017

Wills rägnet simmer halt "weder mol" kli im Outlet go poste... 🙈🙈 Und zur stärchig gits "weder mol" en Burger 🤤😄😄

30 March 2017

Hüttli bezoge 😍😍

29 March 2017

Für 4 Nächt blibe mir jetzt uf dere Insle und gniesset eifach de Summer, de Strand und s'Meer. Hüt übernachte mir imene normale Hotel und für morn hämmer chönne es Hüüsli diräkt am Meer bueche. Uf das freue mir eus wie verruckt 😍
Und wieder goht en Tag z'änd. Hüt simmer kli vill Auto gfahre. Es Zwüscheziel isch en kline Nationalpark gsi. Die Fahrt het sich glohnt. Au das isch wieder en wunderschöne Fläck uf dere Wält gsi. Mir sind z'fuess dure Park und ufe kline Ussichtsturm (de erst in der USA wo gratis gsi isch 😄) I dem Park hets mietbari Hüttli und Campingplatz voll under Palme geh. Kurz hämmers fast bereut, keis Wohnmobil gmietet z'ha. Nächst mol denn 😉😉

28 March 2017

Serst Hotel agfahre, nacheme Zimmer mit Meerblick und Balkon gfrogt und das becho: 😍😍😍🌅
Ufem Wäg zrug an Strand isch eus no es klises Naturschutzgebiet übere Wäg gloffe. Es isch e Wunderschön glägeni klini Quelle gsi. Dört hämmer denn s'erste Mol en Aligator live gseh 🤗
Am 6:10 het de Wecker gschället. Ohni Reservierig hämmer aber am 7i tatsächlich e Schnorcheltour zu de Seechüeh chönne bueche. Mitem Boot ischs is flache Gwässer gange, wo mir denn im Neoprenahzug is Wasser plumpset sind. Leider ischs sehr trüeb gsi, so dass mir fast nüt gseh händ. Plötzlich isch aber doch no eis uftaucht, so dass mirs händ chönne streichle. När simmer no in sone chöini Bucht mit ultra klarem Wasser. Leider hets dört denn "nur" Fischli gha. Trotzallem es super cools Erläbnis 😍

27 March 2017

Für hüt es kliises Motel imene kline Dörfli gfunde. Morn müemer am halb 7i use, zum mir de Seechüe (Manatees) chönne go schnorchle 😳😋😋
Mitem Auto UFEM Strand fahre isch au lässig 😄
Daytona Speedway. E Füehrig vo 90min buechet. Sehr interessant. Mir si uf d'Rännpiste, is Fahrerlager und uf Tribüne.
Im "Knarzi-Bett" sowas vo nid chönne schlofe.. Dorum d'Situation grad usgnützt und ab an Starnd de Sunneufgang go gniesse.

26 March 2017

Hüt hets am Morge richtig grägnet und gstürmt. Mit händ denn euse Plan gänderet und sind nid e Bootstour in Fort Loderdale go mache, sondern sind richtig Daytona Beach losgfahre. Unterwägs hei mir en kline Abstächer uf Pelican Islands gmacht, wo mir kli id Natur bi wunderdchönem, heissem Wätter si go wandere. Aschliessend in Cocoa Beach es Motel gno, gässe und de Obe am Strand la usklinge loh. Morn wär s'Kennedy Space Center agseit gsi. Aber 300$ für 2 Personeisch ischs eus beidne eifach nid wärt. So gömmer no uf Daytona und denn a die wunderschön Westküste mit warmen Wasser ☺

25 March 2017

Hüt im grösste Outlet vo de USA gsi. S'einzig wo nid gigantisch gsi isch, sind eusi Usgabe gsi. Mir händ eus ganz guet chönne zrugghalte 😋
Mir si super in Miami acho, händ ohni Problem euses Mietauto chönne überneh und händ schnäll es Motel gfunde. Jetzt simmer kli an Strand go d'wassertemperatur teste und schlönd eus wie sich's ghört miteme Burger de Ran..Buch voll 😊

24 March 2017

A eusem letschte Tag in Toronto simmer no go shoppe, Stadt aluege und aschliessend is Aquarium. Richtig gmüetlich gsi. Morn müemer am 4i am Morge ufs Taxi, weles eus an Flughafe fahrt. Am 06:45 fliegemer denn ändlich uf Miami ad Wärmi.

23 March 2017

Niagarafälle Ein wunderbare Tagesusflug.
Wird hüt en chalte Tag 😥

22 March 2017

Toronto -2Grad 😱 S'erste wo uffallt: - suber - gmüetlich - fründlich En kline Kulturschock nachem luute NY. Hüt i'checkt und d'Ussicht gnosse. Morn erkunde mir d'Stadt.
Zämmefassend chömmer glaub vo NY säge, dass es e riesigi und vielfältigi Stadt isch. Grösteteils isch sehr viel sehr alt. Die Beste Ziite händ die meiste Gebäude hinter sich. Me fühlt sich öfters wie imene alte Film. Teilwis ischs au sehr dräckig und lut. Trotzallem hets eus mega guet gfalle. Es git ganz tolli Egge mit Jöö- bis Wow Effekte. Mir hei eus au immer sicher gfühlt. Es isch wohl au die Stadt mit de meiste Poliziste.
Byebye New York Next Stop Toronto

21 March 2017

Musical Lion King
Hüt hämmer eus es Velo gmietet und sind dure Central Park. Richtig cool gsi bi schönem Wätter

20 March 2017

Timesquare by night Idrücklich, cool und irgendwie sinnlos 😄
Hüt hämmer NY mol vo Obe agluegt.
Burger No. 2 😋😋
Nach 2 Sicherheitskontrollen wie am Flughafen, konnten wir auf die Lady. Tolles Erlebnis!
Euses Hotel Pennsylvania

19 March 2017

Am halb 9ni am Morge simmer uf de Strosse gsi. Es ganz anders Feeling. Mir hei eus eifach wohler gfühlt, als am Obig vorhär, wo eus alles no überfoderet het. Am Time Square isch grad de Halb Marathon am laufe gsi. Ganzi strosse gsperrt und hunderti Läufer (minimum genau so vieli Poliziste). När simmer kli am Wasser entlang bis zum WTC spaziert und hei die erste Sunnestrahle gnosse. Mit de Fähri simmer de uf Staten Island gfahre, wo me e absoluti Traumussicht uf d'Skyline vo NY het. Gstärkt hei mir eus mitem Beste Burger vo NY im Corner Bistro. Ufem Ruckwäg is Hotel no über d'High Line, e Gartewäg ufeme Stillgleite und Höhergleite Güterzugtrasse. Jetzt erhole mir eus churz im Hotel und plane de Obe.
Best Burger in Town 😍
Absolut geili Ussicht usem Hotelzimmer in NY 😄😄
Gestert zobe am 5i glandet. 3.5St spöter als ursprünglich plant. Nachem Koffer hole hämmer eus es Taxi geleistet, wo eus zum Hotel brocht het. Während der guet 40min fahrt is Zentum vo NY, isch d'Erschöpfig cho. Mir händ eifach nur no is Hotel welle. Im Hotel isch eus aber bewusst worde, dass mir nid drum herum chömed, irgendwo öbbis go ässe. Mir bruchet no kli Energy. Also doch nomol schnäll use. De Wind peitscht zwüsche de Hüserschluchte dure, so dass die empfundeni Chälti 10Grad tiefer erschiint. Es sich luut. Richtig luut und s'Liecht flackert id Nacht. Die Stadt erschiint für eus so dräckig und alt. Alles schiint ir Ziit stohblibe z'si. Me merkt, dass kei Gäld ume isch, alles in Schuss z'palte. Nach doch kli längerem Sueche hämmer es klises Restaurant gfunde, wo eus beidi agsproche het. Währendem Ässe simmer beid fast vom Stuehl gheit. D'Erschöpfig isch immer grösser worde. Also hämmer grad zahlt und sind denn ufem diräkte Weg zrugg is Hotel.

18 March 2017

Hotel Pennsylvania
Isch OK
Grosses Flugi, vill Lüüt.
Nur knapp simmer nid wichtig gsi
Der Flug war aufgrund technischen Problemen abgesagt. Zum Glück waren wir früh am Flughafen und konnten so schnell eine Umbuchung vornehmen. Die neue Flugroute führt uns jetzt mit einem Zwischenstop in Paris zum Ziel. Schöner Nebeneffekt ist, dass wir jetzt mit einem A-380 fliegen dürfen. Nicht so toll: Wir haben ingesammt ca 4St verspätung.
Flug abgesagt